Ha kine ki khyndiat sngi, ka Hill State People’s Democratic Party (HSPDP), kaba dei ka seng riewlum kaba la rim tam ha Meghalaya, ka la pynpaw ïa ka jinglong kloi ban pdiang sngewbha ïa ka Voice of the People Party (VPP) sha ka Regional Democratic Alliance (RDA) – ka kynhun ïatehlok ki seng ‘riewlum ka Jylla ba kynthup ïa ka United Democratic Party (UDP) bad ka HSPDP. U President ka HSPDP, u Bah KP Pangniang, u la ong ba ka jingthmu ba hakhmat eh jong ka jingïateh lok jong baroh ki seng ‘riewlum ka long ban ïoh synshar ïa ka Jylla ne ban ïoh ïalam. Haba kdew ba ka jingbym don ka jingïateh lok kan pynlong ban shu leit snoh sah bad ki seng heh ka ri, u la ong ba ha ka synshar paidbah, lada phai sha ki khana mynbarim jong ka Jylla ne ka saiñ pyrthei jong ka India, ka long kaba shitom shi kat dei ban synshar hi marwei.
Haba kylli la ka seng kan ïawer ne em ïa ka VPP sha ka RDA, u Bah Pangniang u la kubur ba naduh ba la seng ïa ka RDA, ka jingthmu ka long ba baroh ki seng ‘riewlum kin ïadon lang, ïa kdup lang bad haduh mynta ruh, ka kynhun ka don ïa kajuh ka nongrim. U la kam ruh ba ka jingthmu ka dei kajuh – ka jingïohi, jingangnud, kajuh ka jingkyrmen ba kan don wat ban thaw ïa ka Sorkar lyngba ka jingïatehlok jong ki seng ‘riewlum. U Bah Pangniang u la ong ruh ba u pdiang sngewbha ïa ka VPP ban don lang ha ka kane ka thup jingïateh lok kumjuh ïa kiwei-kiwei ki seng ‘riewlum. Kumban shu kdew, dang shen, ka UDP, ka la khot la wer ïa baroh ki seng ‘riewlum ba kynthup ïa ka VPP, ban ïatylli lang hapoh kawei ka shatri ban ïada ïa ka bha ka miat jong ki trai-ri.
Lehse kine ki artylli ki seng ki la leh klet ïa ki jingkren jong ki nongïalam ka VPP ha kaba ki la ong ba ka jingmih ka VPP ka long halor ka nongrim ba kam dei ban long kum ka HSPDP ne ka UDP. Ka kyrteng ‘seng ‘riewlum’ ka don ha ka VPP, hynrei kane kam mut pat ba ka lah ban trei kumba long kiwei. Ka don la ka jong ka saiñdur bad ka nongrim. Ngi la ïohi ba hadien ka ilekshon MLA ha u snem 2023, ka la don ka jingpyrshang ban thaw da ka sorkar kaba khlem don ka National People’s Party (NPP) bad kumjuh ruh ka BJP. Ka Congress, Trinamool Congress, VPP, UDP, HSPDP bad PDF ki la ïakren ban thaw ïa kaba kum kata ka sorkar. Hynrei ka khlem poi shano-shano. Ha kaba kut, ka UDP, HSPDP bad PDF ki la leit ai jingkyrshan ïa ka NPP.
Hadien ka jingmih na ka ilekshon MP mynta u snem, ka UDP bad HSPDP ki dei ki seng kiba la shah ktah jur tam na ka jingïakhun bad ka jingjop jong ka VPP. Ki nongïalam jong kine ki seng ki sngewthuh bha ïa kata. Ka jinghiar jong ka ‘vote’ ka RDA kam dei kaba kai. Lehse dei namar kane ka daw ki kwah ban tan lang noh ïa ka VPP sha ka RDA khnang ban lait na ka lehraiñ ïoh ba ka lyer jong ka VPP kan pynjah kyrteng ïa ki ha ka ilekshon District Council kaba baroh ki khmih lynti ba kan long mynta u snem hadien ba kut ka jingpynjlan ïa ka samoi treikam jong ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC) da hynriew bnai.
Ka long ruh kaba shai kum ka Sngi ba ka VPP kan ym treh ban ïatreilang bad kitei ki artylli ki seng saiñpyrthei da kaba rung sha kata ka RDA. Ka VPP ka sngewthuh bha ïa ka jingsngew jong ki paidbah khamtam hadien ba ki la pynjop donburom ïa ka ha ka ilekshon MP kaba dei ka ilekshon ka ban sah kynmaw pateng la pateng. Hynrei lehse kan long pat da kumwei lada ka por ka dawa ïa kine ki seng ba kin ïatreilang ban thaw sorkar khamtam lada ym don kiba lah ban jop bun ngut tang marwei. Na ka liang ka UDP bad HSPDP kin hap ban ïa pyneh dohksah ha ka jingïakhun bad ka VPP namar kumba ka long mynta, ki paidbah ki ngiah hi shoiñ ïa kine ki artylli ki seng na ka daw ba ki la pyni da ki kam ba ki kham sngewtynnad ban don beit tang sha ka liang jong ka sorkar wat lada ki hap ban shong tang halor ka tnum jong ka bos.
