Shillong, Naitung 30
Ka Khasi Students’ Union (KSU) Maw-prem Circle hapoh ka jingïalam u samla Pynshngaiñ Lyngdoh Lyngkhoi kum Vice President, ha ka 30 tarik u Naitung 2024, ka la leit ban khynra ‘Work Permit’ biang ha ka sien ba ar ïa baroh ki nongtrei bylla bar jylla kiba trei beaiñ ïa ki kam bapher-bapher khlem da pynbiang ïa ka ‘Work Permit’ hapoh ka jylli treikam jong ka seng.
Ha kane ka jingleit jurip, na ka liang ka seng ka la lap sa kumba 17 ngut tam kiba trei khlem don ïa ka ‘Work Permit’ ba la ai lyngba ka aiñ “The Inter-State Migrant Workmen (Regulation of Employment and Conditions of Service) Act, 1979” bad katkum ki kyndon kiba la shna hapoh katei ka aiñ.
Kumta, na ka liang ka seng ka la beh krad noh shisyndon ïa kitei bar jylla napoh ka Bri U Hynñiewtrep.
Halor kane, na ka liang ka seng ka la kyrpad ïa ki kontraktor ba kin ai kam shwa ïa ki paradoh-parasnam kiba dei ki trai muluk-ki trai jaka bad ha kajuh ka por, ka seng ka la maham ruh ïa kino-kino ki nongpyntrei ba kim dei ban wan ïalam nongtrei bar jylla khlem da pynbiang shwa ïa ka ‘Work Permit’ da kaba kren shai ruh ba ka seng kan ym aili ne aijem ïa kino-kino ki malik kiba wan ïalam nongtrei bar jylla khlem da lah ban pynbiang shwa ïa ka ‘Work Permit’ hashwa bad ha ka por ba ki ïalam trei ïa ki.
Ka seng ka pynpaw ruh ïa ka jingsngewdiaw bad ka jingsngew bynñiaw ban ïohsngew ïa ka jingkren u Myntri Rangbah ka jylla, u Conrad K. Sangma ba wat la ki la don ki aiñ ki ban teh lakam ïa ka jingwan rung kyrthlep ki barjylla ban wan trei hapoh ka jylla, hynrei na ka liang ka jong u la kubur bad ong ba ka sorkar kam ithuh ïa kata ka ‘Work Permit’.
Hapdeng katei ka jingkhynra jong ka seng, kyndit kynsan ka seng ka la ïoh ban bat bad kurup drok na 3 ngut ki bar jylla ha ka thaiñ Jhalupara kiba dang muja ban injek drok khlem jingsalia haba shit ba shai bad kaba kham sngewkyndit ka long ba uwei napdeng kitei 3 ngut u dei uba dang hapoh 13 snem ka rta.
Kumta na ka liang ka Seng ka la bat bad aiti noh ïa kitei ki 3 ngut ki bar jylla ha ki bor jong ka aiñ kata ha Jhalupara Police Output ban leh ïa kaba donkam.
Halor kane ka bynta pat, ka seng ka pynpaw ba dei ka jingtlot jong ka sorkar ba sa ïoh rung laitlan u drok hapoh kane ka jylla, kumta ka la donkam mardor ban pyntreikam noh ïa ka Meghalaya Residents Safety and Security Act (MRSSA), 2016 bad ban ïoh noh ïa ka Inner Line Permit (ILP) khnang ba kine ki aiñ kin long ki atiar ki ban ai jingïada ïa ki rit paid.
Shuh shuh na ka liang ka seng ka kren shai ruh sha ki bor sorkar ba nangne shakhmat kan dang ïai pynjur shuh-shuh ïa ka jingkhynra nongtrei barjylla da kaba ïai ban ha ka nongrim jong ka ‘Work Permit’ bad ong ba ka seng kan nym ithuh ne pdiang ïa kiwei-kiwei pat ki kot ki sla jong ki nongtrei bylla barjylla kiba la ai ha ka nongrim jong kiwei pat ki aiñ khyllah ba la shu ai pyndep rukom.
