Shillong, Naitung 30
Ka Manu Bhaker ka la thoh ïa ka kyrteng jong ka ha ki khana ïalehkai ha ka sngi Ba-ar ban long ka ‘thei ïalehkai jong ka ri India kaba nyngkong eh ban ïoh khur ar tylli ki takma ha ka Paris Olympic.
Ka Bhaker kaba dang 22 snem ka rta ka la lah ban pynlong ïa ka India ban khur takma ha Paris ha ka Sngi U Blei da kaba ka la khur ïa ka takma rnong ha ka jingïakop siat suloi jong ka 10m air pistol para marwei jong ki kynthei bad ka la khur biang sa kawei ka takma rnong ha ka 10 m air pistol (mixed team) ha ka sngi Ba-ar.
Kane ka khlur ïalehkai ka la ïashim bynta ryngkar bad u Sarabjot Singh na ka bynta ban pynliem ïa ka kynhun ïalehkai jong ka South Korea kata u Wonho Lee bad ka Ye Jin Oh da 16-10 ha ka jingïaknieh ban khur ïa ka takma rnong ha ka jingïakhun jong ka ‘playoff’.
Hadien ba ka la long ka nongïa-lehkai kynthei kaba nyngkong eh jong ka ri India bad kaba ar ha ka jingkheiñ kyllum ban khur bun tylli ki takma ha ka Olympic, ka Manu ka la pynpaw ïa ka jingkmen bad ka la ong ba ka sngew sarong shibun ïa ka jinglah jong ka. Katkum ka jing-ong ka Bhaker, ka jingtrei shitom jong ka, ka la seisoh ha Paris.
Nga sngew sarong shisha bad ka long ka jingsngewnguh kaba khraw, khublei na ka bynta ki jingkyrkhu bad jingïeid baroh” la pynpaw ka Bhaker hadien ba ka la khur ïa ka takma rnong kaba ar na ka bynta ka India ha ka Paris Olympics 2024.
“Ha ka jingshisha ngim lah ban tehlakam (ïa kaei kaba ki nongïalehkai kin leh), ngi lah ban leh ïa kaei kaba don ha ka kti jong ngi, ma nga bad u paralok jong nga ngi la pyrkhat ba ngin shu pyrshang katba lah bad ngin ïai bteng ban ïaleh haduh kaba kut. Nga sngew sarong shisha ba nga la leh bha haduh katne,” ka la bynrap.
Ka Bhaker ka dei ka nongïaleh-kai kaba saw jong ka ri India hadien u Norman Pritchard, u Sushil Kumar bad ka PV Sindhu kiba la lah ban khur ar tylli ki takma ha kane ka Olympic.
U Pritchard u dei u rangïalehkai ba nyngkong eh ban ïoh khur ar tylli ki takma ha kane ka juh ka Olympic Games na ka bynta ka Ri India. U la ïoh ïa katei ka nam ha ka jingïalehkai Olympic ha Paris ha u snem 1900 da kaba u la khur ïa ka takma rupa ha ka jingïamareh kaba 200 mitar hurdles bad 200 mitar race, katba u Sushil bad ka Sindhu ki la pyndep ha ka rynsan ha ki ar tylli ki jingïalehkai bapher bapher.
U Sushil u la khur ïa ka takma rupa na ka bynta ka India ha ka jingïalehkai Wrestling jong ka Beijing Olympics ha u snem 2008 bad ka takma rupa ha ka London Olympics ha u snem 2012, katba ka Sindhu ka nongïalehkai badminton ka la khur ïa ka takma rupa ha ka Rio Games 2016 bad ruh ïA ka takma rnong ha Tokyo ha u snem 2020.
Mynta ka Bhaker kaba dang 22 snem ka rta na Haryana kan ïoh ïa ka lad ban thaw ïa ka khana da kaba kan long ka nongïalehkai kaba nyngkong eh na India ban khur lai tylli ki takma sa ha kawei pat ka jingïakop ha kaba ka pynkhreh ban ïakhun sa ha ka jingïakop siat kaba 25 mitar.
