Shillong, Naitung 30
Ka Jylla ka la ïoh da u Lat bathymmai ha ka jaka jong u Phagu Chauhan u Lat uba la leit noh da ka jingbam smai u Chandra-shekhar H Vijayashankar hadien ba u la shah bynshet ban shimti kum u Lat ka Meghalaya.
La pynsmai ïa u Vijayashankar kum u Lat ka Meghalaya da u Chief Justice ka Meghalaya High Court u Justice S Vaidyanathan ha Raj Bhavan ha ka jingsakhi lang ki heh ki haiñ kiba kynthup ïa u Myntri Rangbah, u Conrad K Sangma, ki Symbud Myntri Rangbah Bah Prestone Tynsong bad Bah Sniawbhalang Dhar, ki Myntri Sorkar, ki MLA, ki ophisar pulit bad ki ophisar jong ki tnat bapher bapher ka Sorkar nalor ki heh shipai bad ki bahaïing bahasem jong u Lat.
U Phagu Chauhan u la kut ka samoi jong u kum u Lat hadien ba u la pyndep pura san snem kata kum u Lat ka Bihar naduh ka 29 tarik Naitung, 2019 haduh 13 tarik Rymphang, 2023 bad hadien kane, la pynkynriah noh kum u Lat ka Meghalaya naduh ka 18 tarik Rymphang, 2023 haduh 29 tarik Naitung, 2024.
Ka President ka ri ka la thung thymmai ïa u Lat ha ki katto-katne ki Jylla kynthup ha Meghalaya ha kaba la pynmih ïa ka jingpynbna ha ka 27 tarik mynta u Naitung da kaba thung ïa u Vijayashankar ban shimti kum u Lat ha ka jaka u Chauhan.
U Vijayashankar u dei u nongïalam saiñ pyrthei na Karnataka bad u la long teng u dkhot ka Karnataka Legislative Assembly bad kum u MP ka Lok Sabha na Mysore Lok Sabha constituency ha ki snem ba la leit.
U la long teng ruh u dkhot jong ka Karnataka Legislative Council bad u dei ruh u nongïalam uba la ju don teng bad ka BJP bad ka Congress.
Ha u snem 2017, u Vijayashankar u la mih noh na ka BJP bad u leit pynïasoh bad ka Congress, hynrei ha u snem 2019 pat u la leit pynïasoh biang bad ka BJP.
Haba kren sha ki lad pathai khubor hadien ba la dep ban bamsmai kum u Lat, u Vijayashankar u la ong ba ka dei lad kaba khraw ban ïoh shakri kum u Lat bad u pynpaw ka jingsngewnguh ïa ka President ka ri bad ïa u Myntri Rangbahduh ka ri kiba la bynshet ïa kane ka kyrdan.
Haba batai shaphang ki kam bad ki kyrdan kiba u la bat ha ki snem ba la leit, u la ong ba ka kyrdan kum u Lat ka dei kaba kham bun ka jingkitkhlieh.
U la ong ba u wan na ka jaka ha Karnataka kaba ker tawiar da ki dieng bad ki khlaw kumba long hi kum ka Meghalaya.
“Nga la ïohsngew shaphang ka jingkhuid jong ka nongbah Shillong bad ka jinglehkhuid ka dei kaba ki nongshong shnong ki buh hakhmat eh,” la pynpaw une u Lat uba khlem pat da tip tikna lehse shaphang ka jingbret pathar ïa ki jaboh jabaiñ ha lynti-syngkien bad ki rud surok da ki nongshong shnong.
Nalor ka jingkhuid, u Lat u la ïaroh ruh ïa ka Meghalaya kum kata ka Jylla kaba don ka jingshongsuk, bad ym don ka jingthut ha ka shongsuk shongsaiñ bad ki briew ki long kiba lah ban don ka jingïadei kaba jan.
U la ong ruh ba kum u Lat um leh na bynta kaba dei shimet ne na bynta ka saiñ hima hynrei un trei da kaba shimlang ka jingshaniah jong baroh.
“Ynda la kut ka samoi jong nga kum u Lat, nga kwah ba ki briew kin ong bad pyrto ba ngi la ïoh u Lat babha,” u la ong.
Shuh shuh une u Lat ka Jylla u la pynkynmaw da ka jingkmen ba mynba u dang don ka lynti ïaid jong u kum u MP, bad haba u rung hapoh Parliament u (L) Purno Agitok Sangma uba dei na Meghalaya u long u Lamphang ka Ïingdorbar Thawaiñ Lok Sabha ha kato ka por, bad mynta haba u wan ban shimti kum u Lat ka Meghalaya, u khun jong u Purno u dei u Myntri Rangbah ka Meghalaya.
U la ong ruh ba kaba donkam ka long ba ka Sorkar kan ïaid beit ha ka jingtreikam jong ka.
U la ong ba u buh hakhmat kumno ban pyntreikam ïa ki kam pynroi ym don palat ban ïa kata ka thong ha u kum u Lat.
