Agartala, Naitung:
Ki pulit jong ka Tripura bad ki shipai ïada khappud (BSF) ki la ïoh ban kem ïa 28 ngut ki nong Bangladesh bad 2 ngut ki Rohingya na ki ar tylli ki jaka ha ka por ba la pynlong ïa ka jingleit khynra kaba kyrpang.
Haba ïakren bad ki nongthoh khubor, u Officer-in-Charge jong ka Agartala Railway Station u Agartala u Tapas Das u la pynpaw ha ki bor ba dei khmih, ha ka step jong ka 28 tarik, Naitung, ki la ïoh jingtip halor ka jingdon jong shibun ki nong Bangladesh kiba wan poi ha ka jaka sangeh rel jong ka Agartala.
“Katkum ki jingïoh jingtip, la ong ba ki shipai BSF, ki shipai ka tnat (RPF), bad kiwei kiwei ki kynhun shipai, ki la khang bad kerkut ïa ka jaka sangeh rel baroh kawei bad ki la khang ïa ki jaka rung bad jaka mih. Hashwa, ngi la ïoh ban kem ïa 10 ngut kiba la shah suba ba ki dei ki bar ri, hadien kane ki shipai BSF ki la kem sa ïa ki 7 ngut, bad khatduh, ngi la kem lut ïa baroh 23 ngut ki nong Bangladesh”, la ong u OC.
U la kdew shai ba la buh jingujor pyrshah ïa ki namar ba ki la rung beaiñ sha Tripura bad ki la pyrshang ban leit sha Chennai. “Ngi la ïalam ïa ki hakhmat ka ïing Kashari bad dawa phah set patok ha ki pulit,” u la bynrap.
Ha kajuh ka por, ha ka Mobile Check Post (MCP) jong ki BSF bad ki pulit ka Tripura kiba hap hapoh ka Amtali ha West District ki la ïoh ban kem ïa 5 ngut ki nong Bangladesh kynthup ïa uwei uba don ka jinglong shynrang bad kynthei.
Ïa kine kiba la shahkem la tip kyrteng kum u MD Tamim Hussain (18), u Biplab Banik (53), u Utpala Banik (42), u Nijhar Banik (17), u Juli Pal uba don ïa ka jinglong kynthei bad shynrang uba la 18 snem ka rta.
Na ka liang jong ki BSF ki ïathuh shuh shuh ba sa ha kawei pat ka jingjia, ki la don arngut ki Rohingya kiba dei ki nongwad kam sha kylleng kiba la rung beaiñ ha kane ka ri, ki la shahkem noh ha ka kynhun jong ki shipai BSF kiba la pynjur ïa ka jingpahara ha ki bynta khappud jong ka BOP Tillabazar kaba hap hapoh ka District North Tripura ha ka por ba ki dang thmu ban rung sha ki jaka jong ka India.
“Ka jingïoh khubor ha ka por ba biang ka la ïarap ban ïohkem ïa uwei u nongkhaïi tuh. Ka jingtohkit ïa une uba la shahkem ka dang ïaid shakhmat. Ki BSF ki la pynkhlaiñ ïa ka jingpahara bad ki jingtreikam ha ki khappud ban khanglad ïa ki jingpyrshang jong ki nongwan buhai shnong bad ki nongkhaii tuh”, la ong ki BSF.
