Shillong, Naitung 30
Uwei u samla u la duh noh ïa la ka jingim hadien ba ka la don ka jingïatynrah bad kawei ka trok ‘Dumper’ kaba la phet krad noh.
Katkum ka khubor ba la ïohlum na ki pulit ka South West Garo Hills ha ka Sngi Ba-Ar, la ong ba ka la don ka jingkhlad jong uwei u briew ha Chondonpara bad mar ïa ïoh jingtip halor kane, ki pulit ka Monabari ki la leit sha katei ka jaka ban tohkit.
Haba ki la poi ha katei ka jaka, ki pulit ki la lap ïa ka metïap jong uwei u samla ha kaba ka khlieh jong u ka la pra. La lap ruh ba ka la don kawei ka thuk-thuk kaba don ïa u nombor ML-14-7809 kaba la don hajan bad utei uba la khlad.
Kham hadien, ki pulit ki la lah ban ithuh ba utei uba khlad u dei ba la tip kyrteng kum u Bilsrang R Marak, 30 snem ka rta, na ka shnong Chondonpara kaba hap hapoh Garodoba bad hapoh thanat Ampati.
Shuh shuh ki pulit ki la ong ba katkum ka jingtohkit, la ong ba utei u samla u la don ha lynti na Chondonpara ban leit sha Garodoba da kaba ñiah da katei ka thuk-thuk. Hynrei ynda u la poi ha katei ka jaka ba u la shah tynrah, u la pyrshang ban ïaid nakhmat jong kawei ka ‘Tempo’, bad kata ka jaka ka long kaba khun. Ha kata ka por, ki pulit ki la ong ba ka la don kawei ka trok ‘Dumper’ kaba la wan pyrshah bad uta u samla u la ïa takhuh bad ka trok bad u la khlad noh hashen.
Nalorkata, hadien katei ka jingtynrah, kata ka thuk-thuk ka la kyllon noh ha surok bad hangta, kawei ka longkmie ïa kaba la tip kum ka Rohita Hajong, 34 snem ka rta, na ka shnong Boiragipara, ka la mynsaw bad la pynkit ïa ka sha Belbari PHC.
Na ka liang ki pulit ki dang pyrshang ban wad ïa katei ka ‘Dumper’ bad ki la ïatreilang ruh bad ki pulit na Assam halor kane.
