Shillong, Naitung 30
Ki lad pathai khubor na Assam ha ka Sngi Ba-Ar ki la pyntip ba ki pulit ki la lap ïa ka metïap jong uwei u samla na Shillong napoh ka kamra jong kawei ka ïingbasa kaba don ha Paltan Bazar. La suba ba une u samla u la khlad noh na ka jingdih drok palat (Drug overdose).
Katkum kitei ki khubor, la ïathuh ba utei u samla u dei ba la tip kyrteng kum u Sunny Nongrum bad u shong u sah ha ka shnong Mawpun kaba hap ha Pynthorumkhrah, East Khasi Hills. La ong ba une uba khlad u la don kumba 30 snem ka rta.
Shuh shuh kitei ki khubor ki la ong ba la lap ïa ka metïap jong utei u samla na ka kamra jong ka Hotel Tibet.
Ki pulit ka Paltan Bazar ki la ïoh jingtip halor katei ka jingjia ha ka por kumba 1:20 mynsngi hadien ba u Manager jong katei ka ïingbasa u la ai jingtip.
Ka jingsuba jong ki pulit ba utei u samla u la khlad na ka jingdih drok palat ka long namar ki la lap ïa uwei u tyndong buh drok bad u thyrnia na katei ka kamra.
Shuh shuh la ong ba utei u samla u la leit sha katei ka ïingbasa naduh ka 27 tarik Naitung. Na ka liang ki pulit ki la pynkit noh ïa ka met sha Hospital na ka bynta ban pyndep ïa ka ‘post-mortem’, bad ha kajuh ka por, ki la sdang ban pynlong ïa ka jingtohkit.
