Shillong, Naitung 30
Ki BSF ha ka Sngi Ba-Ar ki la ong ba ha ka Lah Sngi U Blei, ki la ïoh ban kurup 19 tylli ki lieng jong ki nong Bangladesh na ka wah Jadukata kaba don hajan Gumaghat katba ki nong Bangladesh ki dang pyrshang ban rung sha India ban wan tuh bad kit maw bad shyiap.
Ha u kyrwoh khubor, ki BSF ki la ong ba kum kine ki jingïoh kurup ki pyni ba ki treikam ban ïada ïa u pud u sam bad na ka jingwan rung be-aiñ jong ki briew. Hynrei ki la ong ba ki runar na Bangladesh ki pyrshang ban rung sha India lyngba ki wah ban tuh ïa ki maw bad shyiap.
Ha kaba ïadei bad kane ka jingwan tuh ki nong Bangladesh, ki BSF ki la ong ba ki la dep ban ujor sha ki shipai BGB.
Na ka liang ki BSF ki la aiti ïa kitei ki lieng sha ka tnat Customs ha Dangar, East Khasi Hills ban leh ïa kaba donkam.
Nalorkata, ki BSF ki la ong ba ka la don ka jingïalang jong ki Commandant na ka liang ki BSF bad BGB ban ïakren halor ka jingdonkam ban pynkhlaiñ ïa ka jingpahara bad jingpeitngor ha khappud. La ong ruh ba la rai ban pahara lang ha kajuh ka por khamtam ha ki jaka ba ki runar ki ju pyndonkam bha ban rung tuh.
