Jowai, Naitung 30
Ki nongshong shnong kiba hap ban ïaid lyngba ka Shilliang Myntang, Samatan, Thadialong haduh Takhniang, Nongjngi ki pynpaw ka jingsngewkhia namar ka jingsniew palat jong ka surok ha katei ka thaiñ.
Kane ka surok ka pynïasoh ïa kiba bun tylli shnong kynthup naduh ka shnong Mukroh, Barato, Thngrain, Shilliang Myntang haduh ka Nartiang bad Wahïajer-Ummulong.
Kumba long mynta ïa kane ka surok la shna naduh Nartiang haduh Tahkhniang kaba long tang shiteng na kane ka surok bad kaba sah ka dei ka surok kaba la jot rathai haduh katta katta, la ong ka kyrwoh.
Ki nongshong shnong kiba shong bad sah ha kane ka dong ka thaiñ ki la pynpaw ba ki mad shibun ki jingeh jingshitom ha ka leit ka wan ka kit ka bah khamtam ha ka pang ka shitom, bad buh jingeh ruh ban leit donkam sha thanat kaba don ha Nartiang, nalorkata ki khynnah skul kiba leit pule ha ki skul kiba don ha Nartiang, Ummulong Jowai bad wat shaduh sha nongbah Shillong bad kiwei ki jaka ki hap ïaid lyngba kane ka surok.
Ym tang katta ka jingsniew jong ka surok ka buh jingeh wat ïa ki nongrep ban pynpoi ïa ki mar rep jong ki sha ki ïew ki hat kiba don ha Nartiang bad ïew Pynsing kaba don ha ka Wahïajer.
Shuh shuh ka jingsniew jong ka surok ka ktah ïa ki paidbah ha baroh ki liang namar ka surok na Mukoilum haduh Barato la dep shna pynbha bad na Tahkhniang Nongjngi haduh Nartiang la dep shna bad kaba sah ka long hapdeng kane surok naduh Barato haduh Shilliang Myntang la dep shna da ka Scheme NEC bad ka dei ka surok barit bad kaba sah ka long naduh Shilliang Myntang-Tahkhniang haduh Nongjngi ka surok kadei ka bym long shuh ban iaid da ki kali rit lait noh tang da ki Truck bad Dumper.
Halor kane, ki nongshong shnong katei ka thaiñ ki dawa jur bad kyrpad ïa ka sorkar lyngba ka tnad PWD ba kan shimkhia ban pynbha ïa kane ka surok kaba la shah iehbeiñ mynta la bun phew snem.
