Shillong, Naitung 30
Ka Agency for Sustainable Development Initiative (AFSDI) ka la wan shakhmat ban pynbna paidbah halor ka jingpynkynriah ïa ki lynti ban mareh na ka bynta ka ‘Shillong Run- 10K 2024’ ka ban long ha ka 3 tarik u Nailar ha kane ka nongbah.
Ïa kane ka jingïakop mareh ka ban long ha ka por 5:30 mynstep, yn sdang noh na phyllaw jong U Soso Tham Auditorium bad ban pynkut ruh ha katei kajuh ka jaka.
“Kane ka jingkynriah noh na Parking Lot, Polo ka dei na ka daw ka jingïatyngkhuh bad ka Durand Cup ka ban sdang ha kane ka nongbah naduh ka 2 tarik u Nailar 2024 ha Jawaharlal Nehru Stadium,” la pynpaw u Rev. B Syiem, Convener ka Facilities and Operation Committee jong ka Shillong Run ha ka Sngi Ba-ar.
Ïa kane ka jingïakop mareh la phiah sha ar tylli ki kyrdan kata ka Junior (hapoh 15 snem) bad Senior (15 snem shaneng).
Ki lynti ban mareh na ka bynta ka kyrdan Senior kan sdang na phyllaw jong U Soso Tham Auditorium, sha DC Office, A.G. Office Additional Secretariat- All Saint – Barik- Dhankheti – St. Edmund- Fire brigade – Laitumkhrah – Don Bosco – Shillong College – Shillong Commerce – B.K Bajoria – Polo – Majestic Hotel – Orchid Hotel — Bivar Road – State Convention- Garo Baptist Church – All India Radio – Additional Secretariat bad ban pynkut biang ha phyllaw jong U Soso Tham Auditorium.
Katba na ka bynta ka kyrdan Junior & Persons With Disabilities (PWDs) kan sdang na phyllaw jong U Soso Tham Auditorium sha DC Office – A.G. Office – Additional Secretariat- All Saint- Barik- Dhankheti – Don Bosco Square- Pemdngiem- St. Anthony College – All India Radio – Additional Secretariat bad ban pynkut biang ha phyllaw jong U Soso Tham Auditorium.
“Ka phang pdeng jong kane ka long jingïakop mareh ka long ‘Run with diferent abilities” ha kaba ka jingthmu ka long ban pynsngewthuh ïa ki jingeh bad ïa ka jinglong ryngkat dor ki briew ba don jingduna ki dkhot met bad ruh ban pynmih pisa ïa ki lyngkha trei kiba ka Synod ka la seng na ka bynta ki khynnah kiba don jingduna ha ki dkhot met, kata ka Mairang Vidyajyoti Inclusive Secondary School kaba don ha Mairang, ka Community Based Rehabilitation Centre kaba don ha Mairang bad Rev. Amirkha School for Disabled kaba ha Mawlai Mawroh,” la bynrap u Rev. Bidonbok.
