Shillong, Naitung 30
Ka Meghalaya Human Rights Commission (MHRC) ka la pan kaiphod kaba bniah na ki bor pynïaid ka skul JNV bad kumjuh ruh na ka Meghalaya Power Distribution Corporation Limited (MePDCL) halor ka jingïap shah lympat bording ilektrik jong u khynnah pule hapoh ka Jawahar Navodaya Vidhaya (JNV), Mawphlang.
Ha kaba ïadei bad katei ka jingjia, na ka liang jong ka MHRC ka la shim da ka ‘suo moto case’ halor kane ka jingïap shah bat bording jong utei u khynnah.
Katkum ka kyrwoh na u Secretary ka MHRC, une u khynnah skul u kyrteng u Nathaniel Sohtun uba pule klas XI ha JNV, Mawphlang. La ong ba une u khynnah u la shah lympat bording ha ka por ba u dang khreh leit sum ha la ka jong ka hostel.
Ka MHRC ka la bthah ïa ka Principal jong ka JNV Mawphlang bad kumjuh ruh ïa u Chairman cum-Managing Director jong ka Meghalaya Power Distribution Corporation Limited (MePDCL) ban aiti ïa ka kaiphod kaba bniah hapoh jong ka 16 tarik u Nailar, 2024.
Lah ban pynkynmaw ba ha ka 28 tarik mynta u bnai ha ka por 4 duna eiei, ki bor pynïaid skul JNV Mawphlang lem ki khynnah ba sah Hostel lang mar ïa ïoh jingtip ba u Nathaniel u la shah bat ha ka bording ilektrik, ki la leit ban ïarap bad ki la pynkit sha Mawphlang CHC hynrei la ong ba u la khlad noh ha lynti.
