Shillong, Naitung 30
Ka kynhun ki rangïalehkai hockey ka India ka la lah ban pynliem noh ïa ka Ireland da 2-0 kol ha Yves-du-Manoir Stadium na ka bynta ban pynskhem ïa ka kyrdan jong ka ha ka Pool-B ha ka jingïalehkai hockey ki shynrang ha ka Paris Olympics ha ka sngi Ba-ar.
U kapten ka kynhun u Harmanpreet Singh (11 minit & 19 minit) u la ïoh ban thep ar kol na ka bynta ka India ha kaba u la lah ban pynurlong lyngba ka penalty bad hadien sa ka penalty corner na ka bynta ban pynlong ïa ka kynhun jong u ban khur ïa ka jingjop kaba kongsan ha kane ka lympung.
Kham ha shwa ka India ka la lah ban pynliem ïa ka New Zealand da 3-2 kol ha ka jingïakhun kaba nyngkong shwa ba kan pynïakhlad pat pyrshah ïa ka Argentina mar 1-1 kol.
Ym kum ki ar tylli ki jingïalehkai ba la dep, hynrei ha kane ka jingïakhun ka India ka la lah ban pynurlong ha ka kylla step. Kumba ka paw kane ka jingïakhun pyrshah ïa ka Ireland ka long kaba kham suk tam na ki jingïakhun ba la lah jong kane ka lympung.
Wat la ka India kam shym la lah ban thep kol ha ka kylla miet, pynpaw kane ka jingjop ka la lah ban pynlong ïa ka kynhun ban kamai 7 point na ki lai sien ïakhun, katba kane ka jingshah rem ka la pynlong ïa ka Ireland ban duh noh ïa ka lad ban ioh rung sha ka quarter final.
Ka Argentina bad ka New Zealand kin hap ban ïakhun tyngeh na ka bynta ban ïoh ïa ka kyrdan kaba saw ha kane ka Pool. Ki saw tylli ki kynhun ki ban wan ha ki kyrdan ba hakhlieh na kawei pa kawei jong kine ki ar tylli ki pool kin rung sha ka quarter final.
