Shillong, Naitung 30
Ha kine ki khyndiat sngi, ka la don ka jingmih khubor halor ka jingleit ujor jong kiba bun ki nongshong shnong na kane ka jylla pyrshah ïa kawei ka kompani halor ka jingkynnoh ba ka la shukor ïa ki hadien ba ki dep ban bei tyngka da ka jingshah kular ba kin ïoh kamai bun shah.
Ha ka Sngi Ba-Ar, ki la don napdeng kitei kiba shah shukor kiba la phah ïa ki kot ki sla kynthup ïa ki FIR ha kaba ïadei bad katei ka jingshah shukor.
Katkum kawei ka FIR ba la ai da uwei na kiba la shah shukor, u la ong ba ka jingshah shukor jong kito kiba la bei tyngka ha ka kompani ba la tip kyrteng kum ka ‘DAAI Datameter Artificial Intelligence’ ka lah ban poi sha palat shi lak ngut ha ka jylla Meghalaya, Assam bad Nagaland.
Katkum ka FIR ba la phah sha ki lad pathai khubor mynta ka sngi, uta u nongujor u la ong ba kitei kiba la shah shukor ki la thep pisa lyngba ka ‘Google Pay’ ha kaba ka jingbei tyngka ka long hapdeng T. 300 bad T. 4 lak. Une uba la ujor u la ong ba na ka liang jong u, u la bei kumba T. 83,020.
Shuh shuh la ong ba katei ka kompani (DAAI Datameter Artificial Intelligence) ka la kam ha ka ‘Mobile App’ jong ka ba ka treikam na America. La ong ruh ba kane ka kompani ka pyni ïa ki saiñdur (Plan) ba ki briew ki lah ban bei tyngka bad hadien kata, kin ïohnong kham bun.
Ha ka banyngkong, utei u nongujor u la ong ba ka DAAI ka la ïoh jingshaniah hadien ba kito kiba la bei tyngka malu-mala ki la ïoh kylla katto-katne. Hynrei haba ki nongbei tyngka ki la pynkiew ïa ka jingthep pisa, katei ka kompani ka la sangeh syndon ban treikam bad ka khlem treh shuh ban ai ïa ka pisa kaba ka la kular.
Nalorkata, utei u nongujor u la ong ba ha jaka ban siew ïa ka pisa ba la kular, katei ka kompani ka la pynmih pynban da ki ‘Plan’ ba thymmai kaba T. 9,000, T. 12,000, T. 21,000 bad kiwei.
“Kane ka jingleh ka long kum ka jingthok namar katei ka kompani ka la dep ïoh lypa ïa ka pisa ba la bei mynshwa,” u la ong.
Utei u nongujor u la sei ruh ïa ki kyrteng jong ki briew kiba la donkti ban pynïaid ïa katei ka kam. Ha ka FIR, u la kdew ba u don uba kyrteng kum u A Balasubramaniam, hynrei ha ka TrueCaller, la pyni ba ka kyrteng jong u ka dei Amaresh Reddy.
Nalor jong utei, ka don ruh sa kata ka Tina kaba dei peit ïa ka ‘Customer Service’. Ha Meghalaya, ki nongpynïaid ki dei kiba la tip kum u Arun Tamang (bad ïa uba la ju tip ruh kum u Aaron T Sangma), bad dei une uba la wanrah ïa katei ka skhim thep pisa sha ki paidbah. La kynnoh ruh ba ïa une u briew la ïarap da ka kurim jong u kaba la tip kum ka Bernadeth Sangma.
Shuh shuh ki la don ruh sa kiwei pat kiba la dep ban ai FIR pyrshah ïa kitei shikurim.
