Shillong, Naitung 30
Ka Khasi Students’ Union (KSU) lyngba ka Employment Monitoring Cell ka la ai por 48 kynta ïa ka Meghalaya Public Service Commission (MPSC) ban pynbeit bad pynshai ïa ki kynrum-kynram halor ka mat ba ïadei bad ka MCS, MPS bad ‘Statistical Officer’ ha ka tnad Veterinary lym kumta ka seng kam banse ban shim la ki jong ki sienjam ha ba ïadei bad kane ka liang.
“Ka seng ha ka step Sngi Ba-ar ka lah buh dorkhas ha u Chairman bad Secretary ka MPSC halor ki kynrum-kynram kiba mih ha kine ki khyndiat sngi halor ka eksamin thung kam na bynta ka MCS, MPS bad ‘Statistical Officer’,” la ong u Chairman ka Employment Monitoring Cell, samla Reuben Najiar ha ka kyrwoh khubor.
U la ong ruh ba ka seng kam sngew ïahap satia halor ka jingpynshai na ka liang ka MPSC kumba la mih ha ki lad pathai khubor ban pynksan ïa ki jingleh thurmur lajong khlem da sngewkhia ba ka lehkai pat bad ka jingim jong ki samla ka Jylla.
Ka seng kumta ka dawa na ka MPSC ban pyllait paidbah ïa ki ‘mark’ jong baroh ki kyrtong kiba ïakhun ïa ka eksamin MCS (Prelims) khnang ba ki kyrtong ïakhun eksamin kin shai halor ka jingshah jied bad shah kyntait jong ki na bynta ka kylla ba-ar jong ka eksamin (Mains Examination).
U samla Najiar u la ong ruh ba ka Seng ka dawa ban thung da ka jingtohkit laitluid ha kaba ïadei bad kane ka bynta.
Ha kajuh ka por, ka seng ka dawa ruh na ka MPSC ban pynshai halor ka jingduna ki samla kiba shah jied ha ka ‘Personal Interview’ jong ka MPS.
“Katkum ka jingpynbna ka MPSC, ka pyni ba yn jied ïa ki samla sha ka ‘Personal Interview’ katkum ka jingïabiang tara 1:10 haduh 1:2.5 na ka kam kaba lait. Namarba pyllait ïa 17 tylli ki kam ha u snem 2019, kumta kaba duna tam ban shah jied ha ka ‘Personal Interview’ kan dei 42 ne 43 ngut, hynrei la ïohi ba ki jied tang 27 ngut bad kane ka la pynkheiñ ïa ka kyndon kaba ka MPSC hi ka lah buh,” u la ong da kaba bynrap, ” Kumta ka Seng ka buh u dak jingkylli ba shaei kita ki 15-16 ngut ki samla ki jah bad kim shim lah mih kyrteng na bynta ka ‘Personal Interview’.”
Haba phai sha ka risol jong ka kam ‘Statistical Officer’, ka tnad A.H. Veterinary, utei u nongïalam u la ong ba la jied ïa 2 ngut ki samla, uwei na ka thup Khasi-Jaiñtia bad uwei na ka thup Garo katkum ka jingpynbna ba lah pyllait ha 27 tarik Jylliew mynta u snem.
“Hynrei kaba sngewlyngngoh ka long ba katkum ka jingpynbna ba la pynmih ha ka 14.12.2020, ka jinglaitkam ka dei tang na bynta 1 (kawei) ka kam bad ïa kane la pynskhem biang da ka ‘Corrigendum’ ba lah mih ha ka 14.09.2022 ka ban dei thik tang ïa kawei ka kam na bynta ka thup Khasi-Jaiñtia,” u la ong.
Shuh shuh u samla Najiar u la bynrap ba ka Seng ka maham jur ïa ka MPSC ba lada kam lah ban pynbeit ne pynshai halor kitei ki bynta hapoh 48 kynta, ka Seng kan shim la ka jong ka sienjam.
