Nongpoh, Naitung 30
Ka Synjuk jong ki nongñiah kali ka jylla Meghalaya bad Assam ha ka Sngi Ba-ar ki la pynlong ïa ka jingïalang ha Nongpoh ban ïakren sngewthuh jingmut bad pynshai halor ka jingjia kaba la jia ha ka 26 tarik mynta u bnai ha Umtyngar, ha kaba kawei na ki seng ha ka jylla ka la bat ïa baroh ki kali Assam ban nym shah hiar sha Dawki bad Sohra.
Ha kane ka jingïalang la wan ban ïashim bynta da ki nongïalam jong palat 11 tylli ki seng jong ki nongñiah kali kamai na ka jylla Assam bad Meghalaya ban ïakren shai khamtam hadien katei ka jingjia kaba la wanrah jingeh ïa ki nongñiah kali ka jylla kiba hiar sha Assam bad kumjuh ruh ka jingsngewthuh bakla ïa kito ki nongñiah kiba wan kiew sha ka jylla.
Hadien katei ka jingïalang, u Bah Tiplang Nongbet, President ka Hynñiewtrep Tourist Taxi Association (HTTA) bad u Robin Dutta, President ka Greater Guwahati Tourist Taxi Association (GGTTA) haba kren sha ki lad pathai khubor ki la pynpaw ba kane ka jingïalang ka long ban pynshai sha ki paidbah nongleit nongwan ba kam don satia kano-kano ka jingpynmih hukum jong ka sorkar Meghalaya ban khang ïa ki kali kamai na Assam ban rung sha ka jylla Meghalaya, hynrei ka dei tang ka jingleh jong katto-katne ki ‘riew shim kabu.
Kawei pat ka mat kaba la ïakren ka dei halor ka jingbun jong ki kali shimet kiba la pyndonkam beaiñ kum ki kali kamai. Halor kane ka bynta ruh, ki nongñiah kali jong ka jylla Assam bad Meghalaya da kawei ka jingmut ki la rai ban ïatrei ryngkat ban nym ailad ïa kine ki kali shimet ban pyndonkam beaiñ ïa ki kali ban kamai khlem ka jingsiew khajna naba ka ktah ïa ka kamai kajih jong ki nongñiah kali ha baroh ar tylli ki jylla kiba hap ban siew bun ïa ka khajna.
U Bah Victor Malsawma Duia, uwei na ki nongñiah kali kamai na Shillong sha Kad Liengsuiñ Guwahati u la ïathuh ba la ïoh ruh ban ïakren halor ka jingeh jong ki nongñiah kali kamai ka jylla namar ka jingshah khrong pisa kaba palat pud hapoh katei ka Kad Liengsuiñ da ki Mynnong (Agent) na Assam kaba la buh jingeh shikatdei ïa ki. U la pyntip ruh ba na liang ki nongñiah kali ka jylla Assam ha kane ka sngi ki la kular ban shimkhia ïa kane ka bynta ban weng ïa ka jingeh jong ki nongñiah kali ka jylla ha katei ka Kad Liengsuiñ.
