Shillong, Naitung 30
Ka Nongthymmai SC bad ka Madanryting SC ki la long kiwei pat ki kynhun kiba la lah ban pynthikna ban jam sha ka quarter final ha ka lympung ïalehkai Under-20 Fourth Division Football League ba la pynïaid da ka Shillong Sports Association.
Ha ka jingïakhun pre-quarter final kaba la long ha ka Sngi Ba-ar ha SSA Stadium, Polo ka Nongthymmai SC ka la lah ban pynliem noh ïa ka Them Rangshken SC lyngba ka tie-breaker da 7-6 kol hadien ba kine kynhun kim shym la lah ban thep kol haduh kaba kut ka jingïalehkai.
Haba phai sha kawei pat ka jingïakhun, ka Madanryting ka la lah ban pynliem noh ïa ka Mawphlang SC da 3-1 kol. U Michael M Rajee u la ïoh ban khyrwit marwei haduh ar kol ha ka minit kaba 15 & 63, katba ïa kawei pat la thep da u Bankyrshan Ryndong (36). Na ka liang ka Mawphlang ka la lah ban pynphai kylla shi kol lyngba u Firstborn Synrem (45) shwa ba kan mad ïa ka jingshah rem.
Ka jingïakhun pre-quarter final kan long biang ha ka Sngi Balang ha kaba ka Laitumkhrah SC kan ïakhun pyrshah ïa ka Diengpasoh SC ha ka por 1:30, katba ka Mawpdang SC kan ïakynduh pyrshah ïa ka Madan S&CC ha la por 4 baje janmiet.
