Nongpoh, Naitung 30
Kawei ka sumo kamai kaba dang hiar na nongbah Shillong sha Guwahati ka la kylla khongpong noh ha surok bah National Highway 6 mar ïa poi ha ki bynta jong ka shnong Umlyngkdait hadien ka jingshah tynrah ha kawei ka trok. Kane ka jingjia ka la jan poi ruh shaduh u pud jong ka jingïania kaba jur bad satang ban ïashoh ïadat, hynrei da ka jingdon jong ki pulit, la lah ban tem noh ïa ka jingkulmar.
Ka jingmih jingkulmar ka dei hadien ba uwei na ki ‘riew paidbah uba don ha katei ka jaka, u la leit ban sei jubor bad ktah kti ïa u nongñiah jong ka trok khlem da tip satia ïa ka daw lane mano ba bakla, kaba la pynlong pat ïa ki paralok jong utei u nongñiah trok ba kin khie dom bad bitar, ha kaba na ka liang utei u nongñiah trok uba la tip kyrteng kum u Bah Rajesh Marbaniang u la hap ban pyrta “wat ïa ktah kti wat ïa ktah kti.”
Katkum ka khubor ba la ïoh lum, la ïathuh ba katei ka jingjia ka la jia ha ka por kumba 3 baje tam eiei nohphai sngi jong ka Sngi Ba-ar hadien ba katei ka sumo kamai kaba don ïa u number AS03-BC-6621 kaba la kham pynher sted ka la thmu ban ïaid shakhmat ne shim pass ïa katei ka trok kaba don ïa u number ML05-Z-6783. Hynrei, namar ka jingdon jong kiwei pat ki kali kiba sangeh hakhmat, katei ka sumo ka la phai kynsan sha ka liang jong ka trok bad shah tynrah beit-beit na ki bynta ka krung kat haduh ba kan da kylla khongpong syndon.
La ïathuh ba ha kane ka jingjia, ki briew kiba shong hapoh katei ka sumo kiba don kumba 10 ngut eiei kynthup ïa u nongñiah ki la mynsaw malu-mala bad la pynkit noh sha ki jaka ai jingsumar. Na ka liang ki pulit ka thanat Nongpoh ki dang pynlong ruh ïa ka jingtohkit halor kane ka jingjia ban lap ïa ka jingshisha mano ba bakla bad mano ba dei.
