Guwahati, Naitung:
Ka Mizoram bad ka Assam kin sa sdang biang ïa ka jingïakren khappud ha une u bnai ban wan, ka ban long 20 bnai hadien ba ar tylli ki jylla ba shaphang Shatei-lam-Mihngi ki la ïamir jingmut ban wad ïa ka lad ka lynti kaba suk ban weng ïa ka jingïakynad pud hapdeng ki jylla.
U Myntri ka tnat ki kam pohïing jong ka Mizoram u K Sapdanga u la ong ba ha ka sien kaba bud jong ka jingïakren khappud yn pynlong ha Aizawl ha ka 9 tarik u Nailar.Kine ki ar tylli ki jylla ki la pynlong ïa ka jingïakren kaba khatduh ha u bnai Naiwieng jong u snem 2022 ha Guwahati.
“U Home Secretary jong ka Assam ha ka taïew ba la dep u la ïakren bad u Home Secretary jong ngi halor ka jingthmu jong ki ban wan sha Aizawl ha ka 9 tarik u Nailar na ka bynta ban ïakren. Ngi la pynsngew ïa ka jingmynjur jong ngi sha ka sorkar Assam hadien ba ngi la ïamir jingmut bad u Myntri Rangbah ka jylla u Lalduhoma,” la ong u Sapdanga ha ka jingïakren bad ki nongthoh khubor.
Ïa ka kynhun nongmihkhmat jong ka Mizoram yn ïalam da u Sapdanga, katba ïa ka kynhun nongmihkhmat jong ka Assam yn ïalam da u Myntri ka tnad ïada khappud bad ki kam pynroi u Atul Bora.
U Sapdanga u la pynpaw ka jingkyrmen ba ka jingïakren kan wanrah ïa ki soh kiba bha ban wanrah ïa ka jingpynbeit kaba suk ïa ka jingïakynad pud kaba la sah khlem lah ban pynbeit da ki phew snem.
Wat la u Myntri Rangbah ka Assam u Himanta Biswa Sarma ha u bnai Rymphang jong une u snem u la mynjur ban phah ïa u Bora sha Mizoram ha u bnai Lber, kam shym la lah shuh ban shim ïa ki sienjam na ka daw jong ka jingdon ka ilekshon Lok Sabha, ong u Sapdanga.
U la ong ba kam shym la don kano kano ka jingpynkheiñ ïa ka jinglong jingman na baroh arliang naduh ba la don ka jingïakynad kaba jur kaba la jia ha u bnai Naitung jong u snem 2021 ha kaba ki bor pulit jong ki ar tylli ki jylla ki la ïasiat mar kylliang ha ki bynta jong kine ki jylla, kane ka jingjia ka la shim ïa ka jingim jong 6 ngut ki pulit bad uwei u riew paidbah na Assam.
Lai tylli ki distrik ha Mizoram kiba kynthup ïa ka Aizawl, Kolasib bad Mamit ki ïasam ïa u pud u sam ba 164.6 km ha khappud bad ka Cachar, Karmganj bad Hailankandi distrik jong ka Assam.
Ka jingïapher jingmut ka la mih khamtam na ki ar tylli ki rukom pynbeit pud jong ki nongsynshar phareng hapdeng u snem 1875 bad 1933.
Ka Mizoram ka la pynshisha ba ka jaka kaba heh da 509 mer sawdong jong ka khlaw ba la buh kyrpang ha u laiñ ba shapoh, kaba la pynbna ha u snem 1875 katkum ka aiñ jong ka Bengal Eastern Frontier Regulation (BEFR) 1873, ka hap hapoh ka jaka jong ka.
Ka Assam pat ha kawei ka liang, ka la kheiñ katkum ka jingpruid ha ka map ba la pynkhreh da ka Survey of India ha ka snem 1933 katkum u pud u sam jong ka ba la don ha ka Riti synshar.
