Shillong, Naitung 31
Ka lympung ïalehkai 63rd Subroto Cup International Football Tournament na ka bynta ki lai tylli ki kyrdan ïalehkai (Junior Boys, Junior Girls & Sub-Junior Boy) kan sdang naduh 5 tarik u Nailar haduh 11 tarik u Nailur ha nongbah Delhi bad ha Bengaluru.
Ïa kane la pynbna ha ka sngi Balang ha nongbah Delhi ha kaba la ïadon lang ki ophisar naduh u Air Marshal RK Anand VSM, Air Officer-in-Charge Administration & Vice Chairman, Subroto Mukerjee Sports Education Society (SMSES) uba long u kongsan, kumjuh u khlur ïalehkai Paralympic bad uba la ïohpdiang ïa ka khusnam Padma Shri bad Khel Ratna u Dr. Deepa Malik kum u symbud kongsan.
Ïa ka lympung ïalehkai Subroto Cup, la pynlong da ka Subroto Mukerjee Sports Education Society hapoh ka jingkhmih jong ka Air Force Sports Control Board, kaba la sdang nyngkong ha u snem 1960 bad la jer kyrteng hadien ïa u Air Marshal Subroto Mukerjee, uba don ïa ka jingangnud ban kyntiew ïa ka jingïalehkai phutbol naduh tynrai.
Kane ka lympung kan sdang shwa da ka kyrdan ïalehkai Junior Girls (Under-17) ha ka 5 tarik u Risaw ha New Delhi NCR. Ïa ka Sub-Junior Boys (Under-15) yn pynlong ha Bengaluru naduh 19 tarik u Nailar, katba ïa ka Junior Boys (Under-17) yn sdang naduh 2 tarik u Nailur ha New Delhi NCR.
Ïa ki nongïalehkai ba tbit tam (best player) na ki kyrdan ïalehkai jong ki khynnah shynrang bad kynthei (U-17) kin ïoh lad ban leit ïalehkai ha ka Indian Football Centre kaba ha Austria, Germany bad kane ka dei ka jingangnud jong ka Indian Air Force ban kyntiew ïa ka phutbol naduh dangrit.
Ha kawei pat ka kam ba pawnam, ki kynhun kiba mihkhmat ïa ka Ladakh bad Punjab kin ïashim bynta ha ka sien kaba nyngkong eh ha kane ka lympung, kaba pynkiew ïa ka jingïashim bynta jong ki jylla bad ki Union Territory sha ka kyrdan kaba heh tam ha baroh ki por. Ha kane ka lympung ïalehkai mynta u snem yn ïohi ruh ïa ki kynhun na ki saw tylli ki ri bar ri kiba ïashim bynta kata ka Sri Lanka, Bangladesh, Bhutan bad Nepal. Ka Sri Lanka bad ka Bangladesh kin ïashim bynta ha baroh lai tylli ki kyrdan, katba ki kynhun na Bhutan bad Nepal kin ïashim bynta ha ka kyrdan Sub Junior Boys (U-15) bad Junior Boys (U-17).
Nalor ka Ambedkar Stadium bad ka madan phutbol Tejas ha New Delhi, ka G.D.Goenka Global School bad ka KIIT World School ha Gurugram kin long ki jaka ha ka thaiñ Delhi/NCR. Ha Bengaluru, ki jingïakhun kin long ha ka ASC Centre, ka Air Force School, ha Jalahalli, ka Air Force School, ha Yehalanka, bad ha madan phutbol jong ka HQ Training Command.
Baroh 111 tylli ki kynhun kiba ïashim bynta ha kylleng ki lai tylli ki kyrdan kin mihkhmat ïa ki Jylla bad ki Union Territory (UT), ki tnad pule puthi bapher bapher jong ka ri, bad ki kynhun na ki saw tylli nabar ri. Palat 200 tylli ki jingialehkai phutbol la buh ban pynlong ha baroh lai tylli ki kyrdan.
Ka Govt. Model Senior Secondary School, Sector 37B, Chandigarh ka dei ka kynhun kaba la bat ïa ka nam lahduh ha ka kyrdan Junior Boys, katba ka St. Ka Minerva Public School, Mohali ka la long ka lahduh ha ka Junior Girls. Ka Minerva Public School, Mohali ka la long ka kynhuin kaba nyngkong ban khur ia ka nam lahduh ha ka Sub-Junior Boys ïa kaba la mihkhmat na ka Council for the Indian School Certificate Examinations (CISCE) ha Bengaluru.
Kum ban shu pynkynmaw, na ka jylla Meghalaya yn mihkhmat da ki lai tylli ki skul na Ri Bhoi District kata ka Christian Higher secondary School bad ka Mynken Higher Secondary School ha ka Under -17 ki kynthei bad shynrang, lem bad ka Nongjri Presbyterian Secondary School ha ka Under -15 ki shynrang hadien ba ki la rah ïa ka nam lahduh ha ka State Level Subroto Mukherjee Football Cup 2024 kaba la long mynta u Naitung.
