Shillong, Naitung 31
Kum shi bynta ban pynthikna ba kan nym mih ka jingkulmar ne ka jingktah ïa ka shongsuk-shongsaiñ ha ka sngi shong bishar ïa ka kam ba ïadei bad ka Lum Survey, ka Deputy Commissioner (DC) jong ka East Khasi Hills ka la hukum ban buh ïa ki pulit pahara ha kane ka jaka.
Lah ban kdew hangne ba ka ïingbishar kan sa shong bishar ha kaba ïadei bad ka kam ha Lum Survey ha ka 19 tarik Nailar, 2024.
Kane ka jingshim rai ka la long hadien ka jingïalang ba la pynïaid da ka Deputy Commissioner Kong RM Kurbah ha ka Sngi Balang ha kaba la ïashim bynta da u Superintendent of Police ka East Khasi Hills District, u CEO jong ka Shillong Cantonment Board bad ruh u President bad Secretary ka Hynñiewtrep Youths’ Council (HYC). Haba kren sha ki lad pathai khubor, ka DC ka la ong ba kane ka jingbthah ïa u SP ban buh ïa ki pulit pahara ha katei ka thaiñ ka long kum shi bynta ban pynthikna ba kan nym mih kano-kano ka jingkulmar tad hadien ba ka ïingbishar kan pynmih ïa ka hukum ynda ka la shong bishar ïa ka mukotduma ka ban long ha ka 19 tarik Nailar.
Ka Kong RM Kurbah ka la ong, “Ngi la rai ban ap ïa ka hukum jong ka ïingbishar bad ngin bud ïa kaei kaba kan bthah.”
Haba kylli halor ka kaiphod jong ka jingwan jurip ba pynlong ha ka 8 tarik Jymmang, ka Deputy Commissioner ka la ïathuh ba u Defence Estate Officer (DEO) u la pyntip ba nalor lai ngut kiba la ujor sha ïingbishar, ki don ruh kiwei, kiba sah beaiñ ha Lum Survey.
Shuh shuh ka DC ka la ong ba hadien ba ka ïingbishar ka la pynmih ïa ka ‘stay order’, kumta la hap ban ap shwa ïa ka rai jong ka ynda ka la dep ban shong bishar kam ha ka 19 tarik Nailar bad hadien kane, u DEO un sa shim ïa ka rai bad ka la pyntip ruh ba kane ka jaka ha Lum Survey kam dei satia jong ka Sorkar hynrei jong ki bor shipai.
Ha kawei pat ka liang, ka DC ka la pyntip ba ki don palat kumba 80 haduh 90 tylli ki ïing ha Lum Survey kaba la paw katkum ka jingleit jurip (survey) ba la pynlong da u DEO bad ong ba kine ki briew kiba shong ha kane ka jaka, ki la shong khlem da ïoh jingbit.
Katba na ka liang jong u President ka HYC Bah Roykupar Synrem u la ong, na ka liang jong ka seng kan ap shwa haduh ka 19 tarik bad lada ka kam, kam urlong kumba dei ban long kata ba ki dei ban shah kyndang beit, ka seng kan ym banse ban shim ïa ki lad ki lynti ba tyngeh.
“Ka jinghiar jurip dang shen ka la sei madan ba bun ki briew ba sah ha kane ka jaka ki dei kiba sah beaiñ. Ngin ap ïa ka hukum ban pynmih da ka ïingbishar hadien ka 19 tarik Nailar. Hynrei, lada ym leh eiei ïa kine kiba sah beaiñ, ngin ym don lynti pat da kumwei hynrei ban leh eiei hi da kaba tyngeh,” la maham une u nongïalam ka HYC.
