Tura, Naitung 31
Ka AHAM, Central Executive Body (CEB) – Tura ka la ujor sha u Myntri Sorkar Pdeng ka tnad kam pynroi nongkyndong bad ka rep ka riang, u Shivraj Singh Chouhan ban kyrpad phah tuklar ha u halor ka jingpynslem ïa ka jingsiew bainong haba ïadei bad ka skhim MGNREGA hapoh Ri-lum Garo.
Ha ka jingujor ba la phah sha u Myntri ha ka 22 tarik mynta u bnai, ka seng ka la pyntip ba katba ka MGNREGA ka la long ka nongpyllait im na bynta kiba bun ki nongshong shnong ha ki jaka nongkyndong, ka bainong sngi hapoh jong kane ka skhim ka la sahteng mynta la bun-bun bnai ha Ri-lum Garo katba katto-katne ki C&RD Block kim pat shym la pyllait ïa ki jingsiew naduh u snem 2023.
Katkum ka jingïathuh ka seng, ki nongtrei khamtam ki kynthei bad kito kiba duna ka ïoh ka kot ki la shah pynbor ban ap da ki bnai, ki snem ban ïoh ïa ka bainong jong ki – kaba la ktah shi kat dei ha ka liang ka pisa bad ka jingshah pynduh ïa ka hok jong ki.
“Kane ym tang ba ka pyntroiñ ïa ki lad kamai jong ki nongtrei ha ki jaka nongkyndong hynrei ka pynduh ruh ka jingshaniah bad jingkyrmen ha ka jingkular ka Sorkar haba phai sha ka bha ka miat jong ki kumjuh ban kyntiew ïa ki nongkyndong,” la ong ka seng.
Ka seng haba kyrpad ïa u Myntri ban shimkhia ïa katei ka kam kumjuh ban pyntikna ïa ka jingsiew biang por ïa ka bainong, ha kajuh ka por, ka la kyrpad pynkiew ïa ki sngi, kata na ka 100 sha ka 150/200 sngi ha ki Scheduled Area, ka jingpyntreikam ïa ka ‘Labour Budget’ bad ka jingpynsted ïa ki kam kot kam sla ban pyllait ïa ka bainong, ban pynbiang ïa ka ‘Unemployment Allowance’ kumjuh ban bthah ïa u BDO ban shah ïa ka ‘Social Audit’ da ki kynhun shnong haba ïadei bad man la ki projek bad jingmyntoi.
