Shillong, Naitung 31
Ka Jawaharlal Nehru Stadium kaba don ha Polo, Shillong kaba long ka stadium kaba la rim tam hapoh ka Jylla ka la sdang ban phuh-phieng bad itynnad biang lyngba ka jingwan jong ka lympung ïalehkai 133rd Indian Oil Durand Cup.
Kane ka long hadien ar snem ba la sdang ka jingmaramot ïa katei ka stadium ha u 2022 ha kaba ki paidbah ‘riew ieid phutbol kim shym la ïoh shuh ban sakhi ïa ki lympung ïalehkai kiba heh ha kane ka stadium.
Ha kane ka nongbah yn pynlong ïa ki jingïakhun jong ka Group-F kiba kynthup ïa ka Shillong Lajong, ar tylli ki kynhun ïalehkai na ka Indian Super League (ISL), ka Goa FC bad Hyderabad FC lem bad kawei ka kynhun na Nepal ka Tribhuvan Army FC.
Halor kane ka rukom pynkhreh-pynkhrum na ka bynta katei ka lympung, na ka liang u Myntri ka tnat ïalehkai jong ka Sorkar Jylla u Bah Shakliar Warjri ha ka Sngi Balang u la leit ban jurip ïa katei ka stadium ha kaba la synran lang da ki ophisar ka tnad ïalehkai, ki nongïalam ka Meghalaya Football Association, kumjuh ki bor pynïaid ïa ka Durand Cup Organizing Committee nalor kiwei pat.
Kane ka jingleit jurip u Myntri ka long ar sngi shwa ka jingïakhun ba nyngkong jong ka Group-F jong kane ka lympung ka ban long ha ka 2 tarik u Nailar, 2024 hapdeng ka Shillong Lajong FC bad ka Tribhuvan Army FC ha ka por 4 baje nohphai sngi. Kan dei ruh ka sngi ba ki paidbah kin ïoh ban ïuh-kjat biang ha kane ka madan na ka bynta ban sakhi ïa katei ka lympung kaba heh ha ka ri.
Hadien ba la dep ban jurip, na ka liang u Bah Shakliar u la pynpaw ba kane ka jingpynkhreh ka dang ïaid shaid shaid na ka bynta ban pyndep noh ïa kiba dangsah.
U la ong ba kumba ka Jylla ka dei kaba ïeid phutbol haduh katta katta, kumta u khmih lynti ba ka jingdon ka kynhun ïalehkai napoh ka Jylla kata ka Shillong Lajong kan pynshongshit ïa ki jingïalehkai ha katei ka lympung kaba la rim bha hapoh ka dewbah Asia bad ka long ka lympung kaba paw bha hapoh ka ri hi baroh kawei.
