Shillong, Naitung:
Ka kynhun jong ka ABVP Meghalaya hapoh ka jingïalam State Vice-President, Dr. Solony Bareh, State Secretary, Tengku M. Marak, dkhot ka Central Working Committee, Kong Nibiang Sumer lem bad ki heh nongïalam Karyakarta ka la leit ban ïakynduh ïa u Lat ka Jylla, u C.H. Vijayashankar hadien ka jingïalang bam smai jong u ha Raj Bhavan ha ka Sngi Ba-ar.
“Ka jingïalang ka la long kaba seisoh bad la ïakren halor bun tylli ki mat ba ïadei bad ka Jylla ba kynthup ïa ka pule-puthi, mariang lem bad kiwei-kiwei ki bynta,” la ong ka kyrwoh na ka seng.
Na ka liang State Vice – President, Dr. Solony Bareh , State Secretary, Tengku M. Marak, dkhot ka Central Working Committee, Kong Nibiang Sumer lem bad ki heh nongïalam Karyakarta, ki la pynpaw ka jingsngewnguh na ka liang ka kynhun sha u Lat halor ka jingai por jong u ban shahshkor ïa ki jingpynsngew haba ïadei bad ka Jylla.
Ka ABVP Meghalaya ka ïai neh ha ka ban ïatreilang bad ka Sorkar Jylla ban shimkhia halor kine ki mat ba kongsan bad khmih lynti ban nang ïoh lad ban ïadon bynta bad ka ophis u Lat ka Jylla.
U C. H. Vijayashankar ha ka Sngi Ba-ar u la bam smai kum u Lat bathymmai ka Jylla ha ka jingïalang kaba la long ha Raj Bhavan, Shillong.
Ïa u Vijayashankar la pynbam smai da u Chief Justice ka ïingbishar ba ha khlieh duh ka Jylla, u Justice S. Vaidyanathan.
Ha kane ka jingïalang, la ïashim bynta lang ruh da u Myntri Rangbah ka Jylla, u Conrad K. Sangma, ki Myntri ka Sorkar Jylla, heh ophisar Sorkar lem bad kiwei-kiwei ki heh ki haiñ.
