Jowai, Naitung 31
Ka Mulang Ïalong, Da I hi Mynsngat bad ka Ïooksi Youth Welfare ki la ïoh jingjop, katba ka Pamanik bad ka Mookyrdup ki la ïasam mar shi point ha ka lympung ïalehkai 4th Adelbert Laloo Memorial Trophy 3rd Division Football Tournament.
Ha kane ka lympung ïalehkai ba la pynïaid da ka West Jaiñtia District Sports Association (WJDSA) ha ka sngi Balang ha Kiang Nangbah Stadium, Jowai, ka Mulang Ïalong ka la pynliem noh ïa ka Nangbah Khloopano da 4-1 kol.
Ha kane ka jingïakhun ka Nangbah Khloopano ka la pynkhih jar nyngkong lyngba u Teibor Lamare ha ka minit kaba 18. Hynrei ka Mulang Ïalong ka la lah ban pynphai kylla lyngba u Shere Mulieh (30), ïa ka kol kaba ar la ïarap pynthep da u rangïalehkai ka liang pyrshah u Niwan Susngi (49) bad ïa kiwei pat la thep da u Tellme Mulieh (54) bad u Nidaroi Mulieh (62).
Ha ka jingïakhun kaba bud, ka Da I hi Mynsngat ka la pynliem ïa ka Lumchyrmang Mihmyntdu da 4-2. Ïa ki kol jong ka Da i hi Mynsngat la thep da u Army Talang ha ka minit kaba 7 & 63, u Deepson Tokbi (26 & 28). Katba ïa ka kol jong ka Lumchyrmang Mihmyntdu la thep da u Embor Chyrmang (34) bad u Soki Chyrmang (70).
Haba phai sha kawei pat ka jingïalehkai hapdeng ka Pamanik pyrshah ïa ka Mookyrdup ki la ïakhaid mar 1-1 kol. Ïa ka kol jong ka Pamanik la thep da u Shanbait Suchiang ha ka minit kaba 15 bad ïa ka Mookyrdup la thep da u Luckystar Sungoh (28).
Ha ka jingialehkai kaba khatduh jong kane ka sngi ka Ïooksi Youth Welfare SC ka la pynliem ïa ka Ksehsylle Ïalong da 2-0 kol. Ïa kine la thep da u Pyrkhat Paslien ha ka minit nyngkong bad u Pyrshang Tangliang ha ka minit kaba 22.
