Tehran, Naitung 31 (UNI)
U nongïalam ka kynhun Hamas, u Ismail Haniyeh, u la shah pynïap ha nongbah Tehran ha ka step jong ka Sngi Balang, katto-katne kynta hadien ba u la wan ban ïashim bynta ha ka jingïalang ba u Masoud Pezeshkian u la shimti kum u President bathymmai ka Ri Iran.
Ha katei ka jingïa-lang, la wan ban ïashim bynta da ki nongmih-khmat na palat 80 tylli ki Ri ba kynthup ïa u Myntri na ka Sorkar India, u Nitin Jairam Gadkari.
Na ka liang ka Hamas, kaba dei ka kynhun kieng atiar na Pales-tine, bad ka Revolu-tionary Guards jong ka Ri Iran ki la pynthikna ba u Ismail u la khlad noh.
La ong ba utei u nongïalam ka Political Bureau jong ka Hamas, uba la don 62 snem ha ka rta, u la shah pynïap hadien ba ka la don ka jingleit khynra ha ka ïing kaba u la shong la sah ha Tehran. Ryngkat bad u Ismail, uwei na ki nongpahara jong u ruh u la ïap lang.
Na ka liang ka Hamas bad ka Iran ki la kynnoh ba ka Israel ka la donkti ha ka jingpynïap ïa u Ismail. Tangba na ka liang ka Israel ka khlem pat ai ïa kano-kano ka jingkynthoh halor kane. Ka jingshah pynïap jong utei u nongïalam ka Hamas ka la wanrah ïa ka jingsheptieng ba ka lah ban don ka jingpynhiar kput.
U Ismail u la don bynta ha ki jingïakren bad ki nongïalam jong ki Ri bapher-bapher na ka bynta ban pynïoh ïa ka jingsangeh ïasiat ha Gaza. Da ka jingkhlad noh ka jong u, kam pat long shai ha kano ka dur ki jingpyrshang ban wanrah ïa ka jingsangeh ïasiat ha Gaza kin shah ktah bad kumjuh ruh ban pyllait ïa baroh ki nong Israel kiba la shah rahbor ha ka Hamas.
Haba pynbna ïa ka jingïap jong u Ismail, ka Hamas ka la ong ba une u nongïalam u la shah pynïap na ka daw jong ka jingleit khynra jong ki Zionist ha ka ïing kaba u la shong la sah ha Tehran. Ka jingshah pynïap jong u Ismail ka wan shi sngi hadien ba uwei u nongïalam jong ka Hezbollah, kaba dei ka kynhun kaba la kyrshan da ka Iran, u la shah pynïap ha Beirut, Lebanon. Ka Israel hi ka la pynbna ba u Fuad Shukr, uba dei u Military Commander uba heh duh jong ka Hezbollah, u la shah pynïap.
Ka Israel ka la kynnoh ba u Shukr u la don bynta ha ka jingshah pynïap jong 12 ngut ki khynnah ha ka Sngi Saitjaiñ ha Golan Heights.
Na ka liang u Supreme Leader ne nongïalam bahalorduh jong ka Iran, u Ayatollah Khamenei, u la ong ba ka Iran ka la plie ïa ka lynti ba kan shah pynshitom da kaba tyngeh bad ba ka dei ka kamram jong ka Iran ba kan pynhiar kput halor ka jingshah pynïap jong utei u nongïalam ka Hamas.
Ka kynhun kieng atiar jong ka Hamas, ha u kyrwoh khubor, ka la ong ba ka jingshah pynïap jong u Ismail kan rah ïa ka jingïakhun sha ki bynta kiba kham halor bad kan don ka jingktah kaba jur.
U Myntri ka tnat ïada ri jong ka Israel, u Yoav Gallant, u la ong ba ka Israel kam shym la pyrshang ban nang pynjur ïa ka thma, hynrei ka la long kaba la khreh na ka bynta kano-kano ka jingjia. Na ka liang ka shlem treikam jong u Ayatollah Khamenei ka la pynbna ba u Ayatollah Khamenei un pynlong ïa ka jingduwai ontep ïa u Ismail. La ong ba ki jingduwai kin sdang na Tehran University ha shwa ban sdang ka jingïaid lynti sha Azadi Square ha ka Sngi Palei.
