Nongstoiñ, Naitung 31
Ha ka Sngi Balang jong ka taïew ar ngut ki dkhot jong ka Khasi Students’ Union, u samla Wanbhakupar Lyngdoh Nonglait kum Organizing Secretary WKHD Unit bad samla Pynbiangbor Basaiawmoit kum Vice President KSU Rambrai Circle ki la shah khot hajir biang ha ki pulit ka Nongstoiñ.
Ha kane ka sngi shah khot hajir ïa kitei ar ngut la synran lang da ki dkhot ka KSU, kumjuh ruh u President ka KSU West Khasi Hills District Unit u samla Johnfisher Nongsiang bad kiwei kiwei.
Ha kane ka sngi, wat la na ka liang jong ki pulit ki la pyrshang ban khang lynti ïa ki nongsynran ïa ki dkhot ba la shah khot hajir, hynrei ki dkhot ka KSU ki la ïaid beit ban synran khlem kynran dien.
Katei ka jingshah khot hajir biang jong kitei ki dkhot ka KSU ka ïadei bad ki kam khynra bar jylla jong ka seng kaba la jia ha kine ki sngi ba la dep.
Na ka liang u samla Johnfisher Nongsiang u la ong ïa ki dkhot bad ki nongïalam la shah khot hajir, shah ai mukotduma kumta ter ter hynrei ïa ki kontraktor, ïa ki malik ba wanrah nongtrei bar jylla ym shym la leh eiei, namar katkum ka aiñ ki kontraktor lane ki malik kiba wanrah ïa ki bar jylla ki dei ban shah kem lada ki khlem pynbiang ïa ki kot ki sla shuwa ba wan trei. Kane ka pyni ïa ka jingnoh shiliang ïa ka jaidbynriew kaba dang rit bad kaba duna paid kaba donkam ka jingïarap na ka sorkar.
U la ong ba kum ki dkhot ka seng na ka por sha ka por ki la ïaid lynti ki la shah kem bad da ki spah ngut ki dkhot kiba la shah pynngat mukotduma bapher bapher, bad kine ki mukotduma ki long ki jingpynduh mynsiem ïa ki samla ba kin rung hapoh ka seng. La ïohi ha kine ki snem bun ki samla kiba dei ban ïoh kam ïoh jam hynrei ki don noh ha ki mukotduma bapher bapher ki duh noh ïa ki jingïoh kam namar ka jingleh jong ka sorkar ban ñion ïa ki samla.
U la ong ba kum u nongïalam, “Nga ïohi ba wat la ki dkhot ka seng ki ngat ha ki mukotduma bapher bapher hynrei kim don ka jingduh mynsiem namar ka jingduh noh ïa ka jingïoh kam ïoh jam hynrei ki don pat ka mynsiem ban trei na ka bynta ka jaidbynriew. U samla Johnfisher u la pynpaw ruh sha ki paidbah nongshong shnong ka Jylla da kaba ong ba kine ki mat kim dei tang na ka bynta jong ka KSU, ka jingkhynra ïa ki bar jylla kam dei ka jingjop ne ka jingrem jong ka KSU hynrei ka dei ïa ka jaidbynriew.
“Kumta nangne shakhmat ngi dei ban sngewthuh ba ki paidbah ki dei ban don ka mynsiem ïa kit ïa bah lyngba ka jingai mynsiem ban pynsngewthuh ba kane ka mat ïa kaba ka seng ka ïeng mynta ka dei ka bynta ban ïada ïa ka bri u hynñiewtrep,” la ong utei u nongïalam.
U samla Wanbhakupar Lyngdoh Nonglait pat u la ong ba kum ki dkhot ka KSU kim sngewphylla shuh ïa ka jingshah khot hajir bad kum ka seng hi kam kynran dien. Kane ka jingshah khot hajir ka long kum ka jingwan dih sha, kam sngew eiei bad u la ong ba nangne shakhmat lada ki tnat trei kam, kum ka Infiltration ka dang bakla, ka seng kan ïaid beit shakhmat ban khynra biang.
