Khliehriat, Naitung 31
Ki pulit jong ka East Jaiñtia Hills District ha ka Sngi Balang ki la kem noh ïa uwei u nongkhaïi drok ba la tip kyrteng kum u Abul Kashim Md Abbas na Patharkhandi District, Karimnganj, Assam.
Katkum ka khubor na ki pulit, la ong ba hadien ba la ïoh ïa ka jingtip kaba bniah ba u Abul Kashim Md Abbas u wan da ka Bus Night Super ha ryngkat ki mar beaiñ, kumta ki pulit ruh ki la pynlong ïa ka jingpynap shrip ha Umtyra.
Na ka liang ki pulit haba ki la ïoh ban bat noh ïa kane ka Bus Night Super bad pynlong ruh ïa ka jingtalasi ha ryngkat ka jingdonlang ki sakhi laitluid ha kaba ki la lapdien ar tylli ki pla bad hapoh kawei ka pla la lap 25 tylli ki synduk sabon kiba don ïa ki powder rong stem.
Hadien ba la leh ïa ka jingpeit bniah la shem ba u dei u Heroin uba don ka jingkhia kumba 290 gram.
Halor kane, ki pulit ki la kem noh ïa une u nongkhaïi bad la pynrung mukotduma pyrshah ïa u hapoh ki kyndon ka NDPS Act bad ka jingtohkit na ka bynta ban lapdien shuh shuh ïa kiba donkti ka la ïaid shakhmat.
