Shillong, Naitung 31
Ka Khasi Students’ Union (KSU) ha ka Sngi Balang haba bteng ban khynra ïa ki nongtrei bar jylla ha ka thaiñ Mawlai, ka la ïoh ban phah leit phai noh sha ka jaka kaba ki wan ïa palat 21 ngut ki nongbylla bar jylla ki bym shym biang kot biang sla.
Ha ka kyrwoh ba la pyllait da ka KSU, la ong ba ki nongïalam bad ki dkhot ka KSU Mawlai Circle ha kane ka sngi, ki la pynlong ïa ka jingkhynra ‘work permit’ ha ka thaiñ bad lap ïa palat 21 ngut kiba wan bylla khlem ki kot ki sla kiba biang.
Shuh shuh ka kyrwoh ka ong ba kane ka jingkhynra ka dei kaba la leh kum ka dak ban pynbor ïa ka Sorkar Jylla ba kan pyntreikam noh mardor ïa ka Meghalaya Residents Safety and Security Act (MRSSA), 2016 bad ka Inner Line Permit (ILP) khnang ban lah tehlakam ïa ka jingwan rung kyrthep ki bar jylla shapoh ka Jylla bad ban ïada ïa ka hok bad ka bha ka miat jong ki paid riewlum trai Jylla.
