Khliehriat, Naitung 31
U Deputy Commissioner (DC) jong ka East Jaiñtia Hills District u la pyntip ba u la dep ban thung ïa ka Empowered Committee ka Department of Prison & Correctional Services ban pyntreikam ïa ka skhim jong ka Sorkar Pdeng na ka bynta ban pynbiang pisa ïa ki koidi baduk kiba don hapoh ka District.
Ki dkhot jong ka Empowered Committee ki kynthup ïa u District Magistrate u ban treikam kum u Chairman, Superintendent, u District Prison & Correctional Home kum u Member Secretary katba kiwei pat ki dkhot jong ka komiti ki kynthup ïa ka Additional District Magistrate (Judicial), u Superintendent of Police bad uwei u ban tyrwa da ka District & Sessions Judge bad Secretary, District Legal Services Authority.
Ki kyndon treikam jong ka komiti ka long ban bishar katno lah ban ai jingkyrshan pisa ban siew baibam, ka bai mukotduma na ka bynta ban ïoh jamin ne siew ïa ka kuna bad kiwei kiwei.
U District Magistrate un sei pisa na ka Account jong ka Central Agency (CAN) bad shim ïa ki sienjam kiba donkam ban thep ïa ka pisa kaba donkam ha ka Kashari.
Kumjuh ka komiti ka lah ruh ban thung ïa u Nodal Officer bad pan jingïarap jong kino-kino ki seng trei mon sngewbha ban peit katno donkam ban ïarap ïa ki koidi.
