Majdal Shams, Naitung:
U Myntri Rangbah-duh ka Israel, u Benjamin Netanyahu, ha ka Lah Sngi U Blei u la leit ban jngoh ïa ka jaka shah hiar thma ha Golan Heights, ha kaba u la byrngem ruh ba ka Israel kan ai da ka jubab kaba eh bha halor katei ka jingther ‘namding jong ki lehnoh ka Lebanon kaba la shim ïa ka jingim jong 12 ngut ki khynnah nong Israel.
U Netanyahu ha katei ka sngi u la ong ba kitei ki khynnah kiba khlad ki dei hi ki khun bad kiba long ruh ka doh- ka snam jong u hi kum ki para jaitbynriew. Kumta ruh u la kular ba ka Israel kan pynhiar kput khlem jingsynei ia katei ka kynhun lehnoh Hezbollah jong ka Lebanon namar ka jingwan thombor dusmon jong katei ka kynhun pyrshah ia ki mynsiem ba lui-lui jong ka Israel.
Ha katei ka sngi, la ong da ki phew ngut ki nongshong shnong jong ka Majdal Shams ki la ïakhih pyrshah ïa katei ka jingleit jngoh jong u Netanyahu hadien ba la tep khatduh ïa uwei u briew uba khlad na katei ka jingjia ha ka Lah Sngi U Blei, ha kaba da ki spah ngut ki nong Druze ki la ïalum na ka bynta ka jingleit on tep ia utei u rangbah ha katei ka sngi.
Namar la ong ruh ba kiba bun hi ki nongshong shnong jong ka Majdal Shams, kim shym la pdiang ia ka jing-long trai ri kum ki nong Israel naduh ki snem ba ka Israel ka la kurup ia ka Golan Heights na Syria ha u snem 1967.
Haba iadei bad kane, la ong ba 12 ngut ki khynnah naduh 10 haduh 16 snem ka rta, ki la khlad noh ha ka Sngi Saitjain haba u ‘namding ba la siat da ki lehnoh Hezbollah na Lebanon u la ther ia ka madan phutbol ha ka shnong Druze Arab ha Majdal Shams katba kitei ki khynnah ki dang ialehkai ha katei ka madan. Katkum ka kaiphod ba la iohlum da ki shipai ka Israel, la ong ba utei u ‘namding ba la siat da ki lehnoh Hezbollah sha katei ka jaka, u dei uba la shna bad pynmih da ka Iran bad uba don ia kumba 50 Kilo ka jingkhia.
Kumta, la ong ba katei ka kynhun lehnoh Hezbollah, kaba ju ia airing man ka por bad ki shipai Israel naduh ba sdang ka thma jong ka Israel ha Gaza, naduh ba sdang jong ka thma ha u Risaw jong u snem ba la lah, ka la kyntait ba kam shym la iadon kti ne iatrei lang eiei bad ka kynhun lehnoh Hamas na Gaza, wat la ka la dep phla ba ka la thombor bunsien ia ki jaka treikam jong ki shipai Israel ha katei hi ka sngi.
Ka Hezbollah ka la pynpaw ruh ba ka jingthombor jongka ia ka Israel ha kine ki sngi, ka long namar ba ka dawa ia ka Israel ba ka dei ban sangeh noh ia ka thma hapoh ka nongbah Gaza, namar katei ka kynhun ka ieng ryngkat bad ka kynhun lehnoh Hamas kaba synshar hi ia ka nongbah Gaza bad ban ai jingkyshan ruh ia ka Hamas katba ka Israel kam pat sangeh ne pynkut noh syndon ia ka thma.
