Shillong, Naitung:
Hadien ka jingsaphriang ki dur khih ba la ïohi ïa ka jingïoh rung laitlan ki nong Bangladesh ha ki thaiñ Dangar, East Khasi Hills District kiba la wan da ki lieng hapoh katei ka shnong bad ki bynta marjan da ka jingthmu ban wan tam maw bad tam dieng, na ka liang ka KSU South West Khasi Hills District bad ka KSU Balat Border Area Circle, ha ka 30 tarik u Naitung 2024, ki la leit ban aiti da ka dorkhas ha ka Deputy Commissioner ka East Khasi Hills District, ka Kong RM Kurbah ba kan tuklar lem halor kane ka bynta.
Namar ka jingbym don jong ka DC hapoh ka ophis treikam ha katei ka sngi, kumta na ka liang ka seng kan sa leit ban aiti noh ïa ka dorkhas ha ka sngi kaba bud.
Haba kren sha ki lad pathai khubor ha ka 30 tarik u Naitung 2024 ha Shillong Press Club, u President ka KSU Balat Border Area Circle, u samla Bonsen Snaitang, u la ong ruh ba katkum ka jingsaphriang na ki dur ba la ïoh ring la ïohi ba kitei ki nong Bangladesh ki ju wan kiew shapoh u pud u sam jong ka Ri India haduh kumba lai sien ha ka shitaïew. Kane ka ju jia ym tang ha ka por mynsngi hynrei wat ha ka por mynmiet ruh kaba la pynlyngngoh shikatdei eh ïa ka seng halor kane ka jingïoh rung laitlan jong kine ki nong Bangladesh ban wan rung shaduh u pud u sam jong ka Ri India.
“Ngi buh ka jingkylli ïa ki bor ba dei peit shato khamtam ki BSF, kumno ki khar Bangla ki lait ban wan haduh marjan shnong bad ka Dangar?”, la ong u samla Bonsen.
Shuh shuh ka seng ka don ruh ka jingsuba jur ba kane ka jingwan kiew jong ki nong Bangladeshi kam dei tang ba ki wan kiew ban wan kit maw hynrei ka don ruh ka jingpyrshang ban pynrung tuh na katei ka jaka ban wan buhai shnong hapoh ki bynta jong ka East Khasi Hills District bad kiwei kiwei ki bynta.
Da kaba pynpaw ïa ka jingbym shaniah ïa ka rukom treikam jong ki shipai ïada khappud (Border Security Force) namar kumba ka paw kine ki shipai ba ap pahara wat la ki ïohi ïa ka jingwan kiew jong ki nong Bangladeshi hynrei ki la shu peitkai bad kim shym la khang ne kem ïa kitei ki nong Bangladeshi kiba wan rung beaiñ hapoh u pud u sam jong ka Ri India.
“Ngim shaniah ïa ki BSF ba lada ki BSF ki don shisha hangto, balei ki khar Bangla ki ïoh ban wan rung shaduh ka thaiñ Dangar? Namar ka jingwan kiew jong ki khar Bangla, ngim lah ban ong ba ki wan ban kiew tang ban tam dieng ne ban wan tam maw hynrei katno tam kan long ka jingma ïa ka Jylla bad ka Ri jong ngi ba kin ïoh rung laitlan kumne”, la ong u samla Bonsen.
Namar kata, ka seng ka la ong ba kan sa leit ban kyrpad ïa ka DC ba ka dei ban tuklar mardor halor kane ka bynta namar ka jingailad ïa ki nong Bangladeshi ka la buh ha ka jingsyier ïa ki paitbah bad ki nongshong shnong kiba shong ba sah ha kito ki jaka.
Ka seng ka dawa ruh ba ka DC ka dei ban shimkhia mardor ïa kane ka jingeh katba lah hashwa ban mih kino-kino ki jingjia ba sngewsih hapoh ka thaiñ bad dawa ruh ïa ka ophis jong ka DC ba ka dei ban phah tohkit bniah bad ban pynshitom ruh ïa kito ki briew bad ki shipai ha ïada khappud kiba donkti ban pynrung tuh ïa ki briew ban wan kit maw ne wan buhai shnong hapoh kane ka jylla.
“Ki don ki briew kiba ïathuh ba shato ki jaka ki ju don ki briew kiba long kum ki ‘dalal’ ban pynpoi briew sha kine ki thaiñ hynrei ïa kata ruh ngim pat lap tikna hynrei lada na ka liang jong ngi ka seng ka lap ïa kum kita, kan nym ailad ïa kum kita ki jait briew ba kin long ki nongpynjot bad ki kruiñ jong ka Ri bad ka Jaitbynriew”, la bynrap u samla Bonsen.
