Shillong, Naitung 31
Ka Meghalaya Clean and Green Organisation (MCGO) ka la pynpaw ïa ka jingpyrshah jur ban aiti ïa ka jaka jong ka tnat Khlaw (Forest) ban pyntreikam na ka bynta ban pynitynnad bad pynbhabriew ïa ka pung Umïam (Umïam Lake Beautification).
Ha kaba ïadei bad kane, ka MCGO lyngba u President Bah RG Warjri ka la phah da ka jingthoh sha u Myntri Rangbah ka Jylla u Conrad K Sangma ban pynpaw ïa ka jingpyrshah jur ban aiti ïa ka jaka ka tnat Khlaw na ka bynta ka jingpynitynnad ïa ka pung Umïam.
Halor kane, u Bah RG Warjri u la ong bad buh jingmaham lypa, ba lada ka sorkar kan ïaid da ka bor ban shim jubor ïa ka jaka jong ka Forest ban pyntreikam na ka bynta jong ka jingpynitynnad ïa ka pung Umïam, ka seng kan sa pynkhreh ban leit da ka lynti jong ka aiñ, pyrshah ïa ka jingleh beaiñ jong ka sorkar ïa ka mei mariang ban pynduh ïa ki khlaw ki btap.
U Bah Warjri u la ong ruh ba ka Climate Change and Global Warming ne ka jingkylla ka suiñ bneng ka dei ka sobjek kaba kum ka seng ka sngewkhia bha bad ka jingkiew jong ka jingshit ha ka jylla, hynrei ka sorkar kam sngewthuh, imat ka sorkar ka ap ba ka jingshit ha ka jylla kan da mih da ka jingduh noh ïa ki mynsiem briew.
Shuh shuh ha kane ka jingthoh ba la phah sha u Myntri Rangbah, ka MCGO ka la ong ba kane ka khlaw kaba don sawdong jong ka pung Umïam, ka dei ruh ka jaka jong kiba bun jait ki mrad, ki khñiang bad ruh ki syntiew, ki kynbat bad kiwei kiwei.
La ong ruh ba kum ka seng kam don jingpyrshah satia ïa kata ka roi ka par ha katei ka jaka hynrei ba kata ka jingkyntiew ne pynroi kam dei pat ban long da kaba ktah ïa ka mei mariang.
