London, Naitung:
Katkum ki khubor, la ong ba ka kynhun nongïakhih pyrshah Muslim hapoh England, ka la ïakynad bad ki pulit ha ka Sngi Ba-ar, ha kaba 3 ngut ki khynnah kynthei ki la duh noh syndon ia ka jingim ha katei ka jingjia bad kumba 8 ngut kiwei pat ki la mynsaw jur ha ka jingshah thombor ha katei ka jaka ba ialum paidbah ha katei ka sngi.
La ong ba kane ka long ka jingjia iakynad kaba shyrkhei tam kaba ka Southport kam pat ju ioh mad mynno- mynno ruh bad ha kane ka por ka la leit jia ha katei ka shnong kaba kynjah bad kaba don harud ka duriaw kaba sha ka phang Shathie jong ka nongbah Liverpool. Kumta, la ong ba kane ka jingjia ka la pynkyndit ïa katei ka ri baroh kawei, ha kaba ki pulit pat ki la pynksan ba kane ka jingjia kam shym don jingiadei eiei bad ki kam thombor jong ki lehnoh.
Hynrei ki kynhun kiba don sha ka liang pyrshah ki la kynnoh ba utei u samla u don kti bad don jingiadei bad ka jaitbynriew Islam. Hynrei na ka liang ki pulit, ki la iathuh ba katei ka jingïakynad ha ka Sngi Ba-ar ka la jia hadien ba ki spah ngut ki paidbah ki la leit kawang tiar ha kawei ka jaka mane Muslim ha katei ka shnong. Kumta, ki pulit ki la suba ba katei ka jingjia ka lah ban don jingiadei bad ka seng English Defence League, ka kynhun kaba ju pynlong teng teng ia ki jingiakhih kiba shyrkhei ban pyrshah ia ka jaitbynriew Islam.
Ha katei ka jingjia, la ong ba shibun tylli ki kali pulit ki la shah pynjulor bad shah thang ha kitei ki paidbah nongiakhih bad ki pulit kiba don ha katei ka jaka ki la shah kawang maw bad shah thombor ha utei u paidbah uba bun ha katei ka sngi bad katkum kawei ka video ba la saphriang paidbah ha ki rynsan ‘Social Media’ la iohi ia ki paidbah kiba pyrta ia kawei ka sur kaba ong “ngi kwah ban ioh biang ia ka ri lajong”.
