Shillong, Naitung 31
Ka sorkar hapoh ka jingïalam u Myntri Rangbah, u Conrad K Sangma, kan ïakren halor ki jingdawa jong ki nongtrei SSA kiba don hapoh ka synjuk jong ka All Meghalaya SSA Non-Teaching Staffs Association (AMSSANTSA) ha ka Sngi Palei.
Ïa kane la pyntip da u Commissioner & Secretary ka tnat pule puthi, u Vijay Mantri, hadien ba u la leit ïakynduh ïa kane ka kynhun ha ka jaka ba ki la pynlong ïa ka jingïakhih ha Madan Malki ha ka janmiet Sngi Balang.
Ka jingdawa jong ka AMSSANTSA ka long ban pynkiew tulop da 80% kaba la sahteng mynta la kumba 8 snem eiei. Mynta ka sngi, kane ka kynhun ka la pynlong da ka jingshong kyllaiñ-myngor ka dei ba ngin pynsngew sha ka sorkar ba kan ai ïa kata ka jingpynkiew tulop kaba la sahteng. Haba kdew ba ka sorkar ka la rai ban ai 25% na katei ka jingdawa, ki nongïalam ka kynhun ki la kren shai ba ka kynhun kam treh satia ïa katei ka 25% bad ha ka jingïalang ki nongïalam ha ka 24 tarik mynta u bnai, la shim ïa rai ban neh beit bad ka jingpynkiew tulop kaba 80% .
Na ka liang u Mantri, hadien ba u la leit ïakynduh ïa ki nongïalam bad dkhot ka AMSSANTSA, u la ïathuh sha ki lad pathai khubor ba u la sngap ïa ki jingdawa jong ki bad na ka liang u Myntri Rangbah ruh u la kren bad ki lyngba ka ‘phone’. U Mantri u la ong ba u Myntri Rangbah u la pyntip sha katei ka kynhun ba ka sorkar kan sa peit bniah ïa ki jingdawa jong ki.
Shuh shuh u Mantri u la ong ba u Myntri Rangbah u la khot ïa ka jingïalang jong ki ophisar ka tnat pule puthi ban ïakren bad ban rai halor ki jingdawa jong katei ka kynhun.
