Shillong, Naitung 31
Namar ka jingplie ïa ka lympung Durand Cup ka ban sdang ha ka 2 tarik Nailar ha madan JN Stadium, Polo, na ka liang jong ka Sorkar Jylla ha ka Sngi Balang ka la pynbna da ka shuti ïa baroh ki skul kiba hap hapoh u pud u sam jong ka Shillong Municipal ha ka 2 tarik Nailar kaba dei ka Sngi Thohdieng.
Ïa kane la pynbna da u Director ka School Education & Literacy u Swapnil Tembe bad la ong ba ka jingshim ïa kane ka rai ban ai shuti ha katei ka sngi ka dei kaba la shim halor ka shithi ba la phah da ka Director ka tnat Sports & Youth Affairs kaba la pyntip ba kan don ka jingïalang plie ïa ka lympung Durand Cup ha JN Stadium, Polo, ha kaba kin hiar ki heh ki haiñ bad kumta kaba lah ban wanrah ïa ka dheng kali kaba jur bha. U la ong ba khnang ba kan nym ktah bad buh ha ka jingeh ïa ki khynnah skul, ka Directorate ka la rai ban ai shuti noh ïa ki skul kiba hap hapoh u pud u sam jong ka Shillong Municipal ha katei ka sngi.
