Shillong, Naitung 31
Ka United Democratic Party (UDP) ka la ong ba kan sa shong ïa ka jingïalang Central Executive Committee (CEC) ha u bnai ban wan ban ïakren halor ka ilekshon shiteng samoi ha Gambegre kumjuh ka ilekshon MDC ka ban sa long hapoh ka Jylla.
“Ngin sa shong ïa ka jingïalang CEC ha ka taïew banyngkong jong une u bnai ban wan,” la ong u General Secretary ka UDP, Dr. Jemino Mawthoh.
U la ong ba ka seng kan sa ïakren ruh halor ka ilekshon shiteng samoi ha Gambegre kumjuh ïa ka ilekshon MDC.
Haba kylli halor ka ilekshon shiteng samoi ha Gambegre, u Dr. Mawthoh u la ong ba ka seng kan sngap shuwa ïa ki jingpynsngew na ki nongïalam (jong ka) ha Ri-lum Garo bad hadien kane kan sa shim ïa ka rai haba ïadei bad kane ka bynta.
Kum ban shu kdew hangne, ka konstitwensi Gambegre ka la sah thylli namar ka jingieh noh kam jong u MLA ka Congress, u Saleng A. Sangma ha ka 10 tarik Jylliew mynta u snem hadien ba u la shah jied kum u MP ka Tura Parliamentary konstitwensi ha kane ka ilekshon ba la dep sha ka Lok Sabha.
Hynrei kumba ka long, ka Election Commission of India (ECI) kam pat pynbna ïa ka tarik na bynta ban pynlong ïa ka ilekshon shiteng samoi ha Gambegre.
Ïa kane ka ilekshon shiteng samoi hap ban pynlong hapoh 6 bnai bad kumta ka lah ban long ha kano-kano ka por mynta u snem.
Katkum ki khubor kiba la mih, la ong ba ka National People’s Party (NPP) ka la ai jingmut ban pynïeng da ka kurim u Myntri Rangbah ka Jylla – ka Mehtab Chandee Sangma ha kane ka ilekshon shiteng samoi ban wan.
Ha kajuh ka por, ka Trinamool Congress (TMC) ka lah ban pynïeng da ka kurim u Zenith Sangma – ka Sadhiarani M. Sangma ha kane ka ilekshon shiteng samoi. Mynshwa, ka Sadhiarani ka la ïakhun arsien na kane ka konstitwensi hynrei ka la shah rem noh tang da khyndiat ‘vote’.
Ka Sadhiarani kaba dei ruh ka MDC ka Dengnakpara konstitwensi ka la ïakhun ha ka ilekshon sha ka ïingdorbar thawaiñ ka Jylla ha u snem ba la dep na Gambegre konstitwensi pyrshah ïa u Saleng Sangma bad shah rem noh da 2,871 ‘vote’.
U Saleng u la ïoh 11,252 ‘vote’ katba ka Sadhiarani ka la ïoh 8,381 ‘vote’. U kyrtong ka NPP, u Rakesh Sangma u la ïoh 7,628 ‘vote’.
Shuh shuh haba phai pat sha ka BJP, ka kyrteng u State Vice-President bad MDC ka Tura, u Bernard N. Marak, ka la paw hakhmat na bynta ka ilekshon shiteng samoi ha Gambegre.
Na ka liang ka Congress ka la pynpaw ïa ka jingkyrmen skhem ban ïoh bat biang ïa ka Gambegre konstitwensi ynda la pynlong ïa ka ilekshon shiteng samoi.
