Shillong, Naitung 31
Ka University Grants Commission (UGC) ka la phah ki jingkylli ban ïoh jingshai na ka Sorkar Jylla halor ar tylli ki kyntien kiba don hapoh ka aiñ shwa ban ai jingithuh ïa ka skulbah jong ka Jylla kaba tip kum ka Williamson Sangma State University.
Haba ïakren bad u Commissioner and Secretary (education), u Vijay Mantri u la ïathuh ba ka UGC ka la pan jingshai la ar sien na ka Sorkar Jylla, kawei ka dei halor ka jingdon ka kyntien ‘Visitor’ bad kawei pat halor ka kyntien ‘Off Campus.’
U la ong ba ka kyntien Visitor ka dei kaba don ha ka aiñ kaba mynshwa naduh u snem 2011 hynrei kane ka kyntien kam dei shuh ban don ha ka aiñ kaba la dep ban wanrah ïa ka jingpynkylla.
Ha kaba ïadei bad ka kyntien ‘off campus’, kaba mut ka jingplie ïa ka tnat jong ka skulbah, ka UGC ka kwah ban tip shai la kane ka tnat jong ka skulbah ka dei ban don tang hapoh ka Jylla ne shabar Jylla.
U Mantri u la ong ba ka kyntien ‘off campus’ ka mut tang hapoh ka Jylla ban plie biang ïa ka tnat jong ka skulbah.
“Ka Sorkar Jylla ka la dep phah ïa kine ki jubab ban pynshai halor ki jingkylli kiba wan na ka UGC. Ha kaba ïadei bad ka kyntien Visitor ngi la jubab kham mynshwa, bad ïa ka kyntien off campus ngi la phah jubab sha ka UGC mynta ka sngi (31 tarik Naitung),” la ïathuh u Mantri.
Khyndiat bnai mynshwa, ka Sorkar Jylla ka la thoh sha ka UGC na ka bynta ba kan ai jingithuh ïa ka skulbah jong ka Jylla bad pynmih ïa ka jingpynbna katkum ka 2F ha ka kyndon ka UGC.
Ki kolej ha Meghalaya haduh mynta ki pynïasoh (affiliate) bad ka skulbah North Eastern Hill University (NEHU) kaba dei ka skulbah kaba pynïaid bad khmih da ka Sorkar Pdeng.
Ynda la ithuh ïa ka skulbah jong ka Jylla, ki kolej ki lah ban pynïasoh noh bad ka Williamson Sangma State University, hynrei ki kolej ki ïoh ka lad ban jied katkum ka mon jong ki bad kano ka skulbah kin leit ban pynïasoh.
