Shillong, Naitung:
Ka Khasi Students’ Union – Nongthymmai Circle ha ka Sngi Ba-ar ka la ïoh ban pynher krad noh ïa kumba 70 ngut ki bar Jylla ki bym biang kot biang sla kiba la wan trei bylla ha ki bynta bapher-bapher jong ka thaiñ Nongthymmai.
Kum ban shu kdew hangne, kane ka dei ruh ka sien ba ar ha kaba ka seng ka la pynlong ïa ka jingkhynra ‘Work Permit’ bad mynta ka sngi, ka jingkhynra ka la long ha ka thaiñ Law-u-Sib, Lapalang, Rynjah bad Nongrim.
“Ka seng mynta ka sngi ka la ïoh biang ban leit khynra ïa ki nongtrei bar Jylla ha ka thaiñ Nongthymmai,” la ong u Assistant Organising Secretary ka KSU Nongthymmai Circle, samla Kyrmenlang Mawrie.
U la ong ruh ba ka seng ka la lap kumba 70 ngut ki nongtrei bar Jylla kiba wan trei hapoh u pud u sam jong ka Nongthymmai bad kumta ka la pynher krad noh mardor ïa ki namar ka jingbym biang ki kot ki sla.
“Ka seng ka buh ka jingmaham ïa baroh ki kontraktor kiba wanrah nongtrei bar Jylla ba sngewbha ban pynbiang ïa ki kot ki sla ha shuwa ban wanrah nongtrei nabar Jylla ki ban wan trei ha Ri Khasi,” u la ong.
Ha kajuh ka por, u la buh ka jingkyrpad ïa ki kontraktor ba shuwa ba kin wanrah nongtrei bar Jylla, ki dei ban ai kam shuwa ïa ki paradoh-parasnam kiba don ha kylleng ka Bri Hynñiewtrep.
Haba kyntu ïa ka Sorkar ban pyntreikam noh mardor ïa ka ILP bad MRSSA, u samla Mawrie u la ong, “Ka Sorkar kam dei ban pyntieng pynsmiej ïa ki dkhot sengbhalang haba ki leit ban khynra ïa ki bar Jylla. Lada phi pyntieng pynsmiej, ngi nang ïoh mynsiem, ngi nang skuiñ bad ngin nang ïa mih hadien-habud bad ngin ym sangeh ïa ka jingkhynra bar Jylla.”
Shuh shuh u la bynrap, “Lada ka Sorkar ka phah kem, ngin ym tieng, ngin ym smiej – ngi la pynkhreh lypa ba ngin shong patok na bynta ka bha ka miat bad ka jingshngaiñ jong ka lawei ki pateng ban wan.”
Na ka liang ka seng kan nang ïai bteng ym tang ha ka thaiñ Nongthymmai hynrei ha man la ki jaka ban khynra ïa ki bar Jylla, u la ong.
“Ngin ïatreilang ha syndah bad ka KSU-Sengkmie la ka long ha kino-kino ki bynta,” la ong utei u nongïalam.
