Shillong, Naitung 31
Ka Laitumkhrah SC ka la pynliem noh ïa ka Diengpasoh SC lyngba ka tie-breaker da 5-3 kol na ka bynta ban jam sha ka quarter final ha ka lympung ïalehkai Under-20 Fourth Division 2024 ba la pynïaid da ka Shillong Sports Association ha ka Sngi Balang.
Ha kane ka jingïakhun pre- quarter final kaba la long ha SSA Stadium, baroh ar kynhun ki la pyrshang ban ïakhun tyngeh naduh kaba sdang, hynrei haduh kaba kut kim shym la lah ban pynurlong. Hynrei dei ha ka jingïashut tie-breaker ba ka Laitumkhrah ka la lah ban kynjoh sha ka thong.
Haba phai sha kawei pat ka jingïakhun, ka Madan S&CC ka la pynliem noh ïa ka Mawpdang SC da 3-0 kol. Ïa kine la thep da u Wankmen Lyngdoh ha ka minit kaa 13, kumjuh u Phermanbha Lyngdoh (69) bad u Anderson Nongkynrih (70+1).
Ka jingïakhun quarter final ha ka sngi Palei kan long hapdeng ka Umrynjah SC pyrshah ïa ka Laitkroh S&CC ha ka por 3:45 janmiet ha SSA Stadium.
Ka SSA kan bteng biang ruh ïa ka lympung ïalehkai Third Division 2024 hapdeng ka Ïatyllilang SC pyrshah ïa ka Umlyngka SC ha ka por 1 baje mynsngi.
