Shillong, Naitung 31
Ki nongtrei SSA hapoh ka shatri jong ka All Meghalaya SSA Non-Teaching Staffs Asso-ciation (AMSSANTSA) ha ka Sngi Balang ki la sdang ïa ka jingïakhih kaba khlem buh por namar ka jingbym shim khia jong ka Sorkar halor ka jingdawa ban kyntiew ïa ka jingpynkiew tulop kaba 80% kaba la sahteng mynta la kumba 8 snem eiei.
“Kane ka jingshong kyllaiñ-myngor ka dei ba ngin pynsngew sha ka Sorkar ba kan ai ïa kata ka jingpynkiew tulop jong ngi kaba la sahteng mynta la 8 snem,” la ong ka President ka AMSSANTSA, Kong Jennifer June Synrem haba kren sha ki lad pathai khubor ha Madan Malki.
Haba kdew ba ka Sorkar ka la rai ban ai 25% na katei ka jingdawa, ka Kong Synrem la kren shai ba ka kynhun kam treh satia ïa katei ka 25% bad ha ka jingïalang ki nongïalam ha ka 24 tarik mynta u bnai, la shim ïa rai ban neh beit bad ka jingpynkiew tulop kaba 80% .
“Na kata ka daw, ngi wan ban shong kyllaiñ-myngor ba ngi kwah ban pynsngew sha ka Sorkar ba kan sngap lem ïa ki jingeh jong ngi namar katkum ka jingkiew ki mar ki mata, ha kata ka rukom ruh dei ban shna ïa ka tulop jong ngi. 25% na bynta 8 snem nga sngew ba kam ïahap bad kumta ngi la shim ïa kane ka sienjam,” la ong ka Kong Synrem.
Ka la ong ruh, “Kane ka dei ka jingsangeh treikam kaba khlem buh por bad kane kan bteng katba ka Sorkar kam pat sngap ïa ki jingdawa jong ngi namar kan shu long kamkai kumba ai bai mit-mit…kan ym pat pynkdang ïa ngi.”
Ka la ong ruh ba ka seng ka la pynsngew ïa kane ka mat naduh u snem 2023 bad leit mih ruh sha u Myntri ka tnad pule-puthi bad Director ka tnad ha ryngkat ki jingthoh.
“Ngi la ap shi ap naduh u Nohprah bad haduh u Ïaïong mynta u snem bad kam poi shaei-shaei haduh ban da poi une u pud…ngim banse ban shong kumne ban pynsngew sha ka Sorkar naba ka jingdawa kam urlong,” la ong ka President.
Ki nongtrei (bym hikai) jong ka SSA ki don kumba 1200 ngut ba kynthup naduh ka Cluster Level, Block Level, District Level bad State Level.
Shuh shuh haba khot bad wer ïa kiwei pat ki para nongtrei, ka la bynrap, “Ka jingmyntoi kan long ïa baroh, ïoh don napdeng jong phi kiba leit trei, sngewbha ban ïasnohktilang bad ngi ban wan lang sha kane ka jingïalang namar ha kaba kut ka dei jong baroh lang.”
Ka la ïathuh ruh ba ki dkhot na Ri-lum Garo ki la don ha lynti ban wan ïashim bynta lang ha kane ka jingïakhih shong kyllaiñ-myngor ba khlem buh por.
Na ka liang u General Secretary ka seng, u Bah Barikupar Mylliemngap, u la ong ba ki nongtrei jong ka SSA na baroh ki district bapher bapher jong ka jylla ki la ïa wan poi naduh ka por 11 baje mynstep ban ïashim bynta ha ka ban pynlong ïa ka jingïakhih da kaba shong ha gallery ha madan Malki.
U Bah Barikupar u la pyntip ba kum ka seng kan ïai bteng ïa ka jingïakhih kaba khlem buh por kat haduh ba ka sorkar kan da pynurlong ïa ki jingdawa jong ka seng.
U Bah Barikupar u la ïathuh ba kumba ka long mynta ym pat don uwei ruh u sahep sorkar ne ki briew jong ka sorkar kiba la wan shakhmat ban wan peit ïa ki nongtrei jong ka SSA kiba la ïakhih hynrei ki shu phah tang da ka shithi halor ka jingkular ban ai tang 25% na kaei ba la dawa bad kum ka seng da kawei ka jingmut ka la kyntait ïa ka jingtyrwa ka sorkar bad kam pdiang ïa ka 25%.
Kum ban shu pynkynmaw ïa kane kajuh ka mat na ka liang u MLA jong ka VPP na Nongkrem Constituency Bah Ardent M Basaïawmoit u la wanrah hapoh ka ïingdorbar thawaiñ jong ka jylla kaba la long ha ka 22 tarik Rymphang 2024 halor ka jingpynthymmai ïa ka jingsiew sha ki nongtrei SSA ki bym dei ki nonghikai bad na ka liang ka sorkar ka la sngap man-man.
Shuh shuh na ka liang u Myntri ka tnad pule-puthi ka Sorkar Jylla u Rakkam A Sangma, u la pyntip ba ka jinglut-jingsep ha kaba siew tulop ïa ki nongtrei SSA ha ka shisnem kiba don haduh 1241 ngut ka la kot sha ka 12.72 klur tyngka. Ha ka jingjubab jong u, u la kular ruh ïa ki nongtrei ba shen kin sa ai ïa ka bhah kaba ki dei ban ïoh hynrei haduh mynta ruh ki nongtrei SSA ki khlem pat ïoh satia ïa ka bynta bad ka bhah ba ki dei ban ïoh.
Na ka liang u nongïalam ka liang pyrshah hapoh ka ïingdorbar thawaiñ ka KHADC bad uba la long teng ruh u CEM, Bah Titosstarwell Chyne haba ïakren bad ki lad pathai khubor hadien ba wan ai mynsiem ïa ki nongtrei SSA kiba la pynlong ïa ka jingïakhih na ka bynta ban dawa ïa ka hok, u la ong ba kum u nongmihkhmat u sngewthuh ba ka dei ka kamram jong u ban wan ïakynduh ïa ki dkhot jong ki nongtrei SSA na ka bynta ban sngewthuh ïa ka jingdawa jong ki. Ha kajuh ka por u la ong ruh ba na ka liang jong u un sa rah ïa kane ka mat ha khmat ka sorkar ba ka dei ban sngap ïa ka jingud-jingnam jong ki nongtrei SSA hapoh ka jylla baroh kawei.
U Bah Titos u la pynkynmaw ruh halor ka jingdon jong kiba bun ki kynhun kiba mih shakhmat ban ïakhih na ka bynta ban dawa ïa ki hok jong ki hynrei na ka liang ka sorkar ka shu sngap bad khlem leh ei ei. Ha kajuh ka por u Bah Titos u la kyntu ruh ïa ka sorkar ba kan sngap ïa ka jingïakhih jong ki nongtrei SSA lada ka sngew ba ki dei kiba shongnia. U la bynrap ruh da kaba ong ba kane kam dei kaba dang thymmai hynrei ka dei kaba la slem bad dei ka kamram jong ka sorkar ban pynbeit ïa ka jingeh jong ki nongtrei SSA.
Hadien katto-katne kynta ki nongïalam ka Voice of the People Party (VPP) hapoh ka jingïalam u Bah Danny Langstieh uba bat ïa ka pla tyngka jong ka State Executive Committee, u la ong ba un sa leit ban pyntip sha u President ka seng u Bah Ardent Basaïawmoit namar ka jingbym lah ka sorkar ban pynkiew tulop ïa ki nongtrei kaba hap ha ka Sarva Shiksha Abhiyan kiba tip kum ki Non-Teaching Staff.
U la ïathuh ba ha ka dorbar ba dang shu dep u Bah Ardent u la dep wanrah ïa kane ka jingeh ki nongtrei ka SSA.
Ha kane ka sngi u Bah Danny bad ki para dkhot ki la ïoh ban phylliew jingmut bad ki nongkitkam ka All Meghalaya SSA Non Teaching Staff kiba sdang ka jingïakhih khlem buh por ha madan Malki mynta ka sngi.
Nalor ka jingdawa pynkiew tulop kaba 80%, ka kynhun ka la dawa ruh ïa ka 2% katkum ka jingslem ha ka kam bad 5% jingpynkiew kaba man u snem.
