New Delhi, Naitung 31
Ka Union Public Service Commission (UPSC) ka la pan jingshai na ka Puja Manorama Dilip Khedkar, kaba la ïoh lad ban ïakhun ïa ka Civil Services Examination-2022 (CSE-2022) ha ka 18 tarik u snem 2014 bad kaba la shim ïa ki lad kiba la palat pud kumba la kdew ha ki kyndon ‘Examination Rules’ da kaba thok ba ka dei mano.
Ka Khedkar kaba la dei ban phah ïa ka jingpynshai jong ka shuwa ka 25 tarik u Naitung, 2024, ka la pan por shuh shuh haduh ka 4 tarik u Nailar, 2024 khnang ba kan ïoh lum lut ïa ki kot ki sla ba donkam ba kan ai ïa ka jubab jong ka.
Ka UPSC ka la peit bniah ïa kane ka jingkyntu jong ka Khedkar bad khnang ban poi sha ka hok, la ai por ïa ka haduh ka 3:30 baje nohphai sngi jong ka 30 tarik u Naitung, 2024 ban plie lad ïa ka ban ai ka jubab jong ka.
Ha kajuh ka por, la kren shai ïa ka Khedkar ba kane ka dei ka lad ba khatduh ïa ka bad yn ym ai por shuh ïa ka palat ïa kane.
Ka tnad ka la batai shai ruh ïa ka ba lada ym ïoh ka jubab na ka shuwa jong ka por ba la buh, kata kan kan shim ïa ki sienjam bad kan ym sngap shuh ïa kaei kaba wan na ka liang jong ka Khedkar.
“Wat ba la ai por shuh-shuh ïa ka, kam shym la phah ïa ka jingbatai jong ka hapoh ka por ba la buh,” la ong ka kyrwoh. Na ka liang ka UPSC ka la peit ïa ki kot ki sla ba don bad ka la lap ba ka la pynkheiñ ïa ki kyndon CSE-2022 Rules. Kumta la weng ïa ka lad jong ka ban ïakhun ïa ka CSE-2022 bad la khang shirta ïa ka ban ïakhun ïa kano-kano ka Eksam/Selection jong ka UPSC nangne shakhmat.
Hapdeng kane ka jingjia jong ka Khedkar, ka UPSC ka la peit bniah ïa ki jingtip ba don shaphang palat 15,000 ngut ki samla kiba la ïoh lad ban ïaleh ïa ki CSE naduh u snem 2009 haduh 2023 kaba mut 15 snem ha kaba ïadei bad katno sien ki la pyrshang ïa kane ka eksam.
Hadien kane, lait na ka jingjia jong ka Khedkar, ym shym la lap ïano-ïano ba la tam ïa u pud ban pyrshang ïaleh eksam katkum ki kyndon ‘CSE Rules’.
Haba ïadei bad kane ka jingjia, ka Standard Operating Procedure (SOP) jong ka UPSC kam shym la lap katno sien ka la pyrshang ïa kane ka eksam namarba ka la pynkylla ïa ka kyrteng jong ka bad ka kyrteng jong ka kmie bad u kpa jong ka.
Shuh shuh ka UPSC ka dang pynkhlaiñ ïa ka SOP ban pyntikna ba kum kane kan ym jia shuh nangne shakhmat.
Halor ka jingai ïa ki syrnot ba thok (khamtam kaba ïadei bad ka jinglong OBC & PwBD), ka UPSC ka pynshai ba ka rukom peit jong ka ïa kine ki syrnot ka dei tang ban sngewthuh ba ki wan ne em na ki bor ba dei ban ai ïa kine – ka syrnot ka dei na uno u snem, ka tarik ba la ai ïa ka syrnot, don ne em ka jingpyndap bad ka jingthoh biang ïa ki jingtip ba la ai ha ka srynot, ka rukom long jong ka syrnot bad kiwei-kiwei ki kam.
Kumjuh, la pdiang ba ka syrnot kam dei kaba thok lada la ai da ka bor ba dei ban ai ïa kane. Ka UPSC kam don ïa ka bor bad kam lah ban peit bniah ïa man ki syrnot ba ai da ki samla man u snem. Hynrei, la shim ba ïa ka jingpeit bniah bad jingpynshisha ba ka syrnot kam dei kaba thok la pyndep da ki bor ba dei ban peit ïa kane ka kam.
