Nongstoiñ, Nailar 01
Uwei u runar ba la tip kyrteng kum u Basil Marngar, u la shah rai pynrem da kaba shah set patok haduh 20 snem kynthih ryngkat ka kuna T.20,000 halor ka jingdonkti ban thombor ïa ka longrynñieng jong ar ngut ki heprit.
Katkum ka kyrwoh khubor ba la phah, ka ïingbishar ka la bthah ruh ba lada utei u runar um lah ban siew ïa ka kuna ba la buh ha ka por kaba biang, un hap bteng shong patok biang sa 6 bnai kynthih.
Ka kyrwoh khubor ka ong ruh ba katei ka jingjia shah thombor jong kitei ki heprit ka la jia naduh ka 11 tarik u Naitung 2022, hadien ba ka kmie jong ki heprit ka la ujor da ka ejahar pyrshah ïa utei u runar bad la pynrung ïa ka mukotduma hapoh ka kyndon 5(1)(n), 6, and 3(b) jong ka POCSO Act ha thanat Mawshynrut bad hadien la pynkynriah noh sha thanat Nongstoiñ Women na ka bynta ban pynlong ïa ka jingtohkit.
Hadien ba la pyndep ïa ka jingtohkit kaba bniah, la charge-sheet pyrshah ïa utei u runar ha kijuh ki kyndon jong ka POCSO Act ryngkat bad ka kyndon 506 jong ka Indian Penal Code.
Kumta ha ka 30 tarik u Naitung 2024, ka Special Judge (POCSO) Court hapoh Nongstoiñ ka la lap bad pynshisha ïa ki kam runar jong u Basil Marngar da kaba pynshong nongrim katkum ki sakhi satar kiba biang bad ka la rai pynrem bad pynngat ïa utei u runar hapoh kitei ki kyndon aiñ ba pyrkhing.
