Shillong, Nailar 01
Ka Ïingbishar kaba ha khliehduh jong ka Ri (Supreme Court) ka la pynmih ïa ka hukum ha ka Sngi Palei da kaba bthah ïa ki Jylla ban ïit ïa ki briew kiba dei kita kiba la biang ha ka ïoh ka kot bad kiew ha ka imlang-sahlang lane ki ‘Creamy Layer’ hapdeng ki Scheduled Castes (SCs) and Scheduled Tribes (STs) bad kum ïa kita dei ban pynduh noh ka jingïoh myntoi jong na ka bhah (reservation).
Kane ka rai jong ka Supreme Court ka dei kaba mih na ka rai jong kiba bun ki nongbishar ha kaba la ong ba ka jingphiah biang ïa ka bhah hapdeng ki SC bad ST ka dei kaba lah ban leh (Permissible) da kaba ïaid lait noh na ka rai kaba mynshwa ha ka mukotduma kaba ong ba ym shah ban phiah shuh shuh ïa ka bhah (sub classification of reservation) hapdeng ki SC/ST.
Ki nongbishar kiba donbynta ha kane ka rai ki long u Chief Justice Chandrachud, nalor kiwei pat ki nongbishar kiba kynthup ïa u Justice BR Gavai, Vikram Nath, Bela M Trivedi, Pankaj Mithal, Manoj Misra, bad Satish Chandra Sharma.
Kaei kata ka ‘Creamy Layer’ hapdeng ki caste bad tribe?
Ka ‘Creamy layer’ ka dei ka bynta jong ki briew kiba don hapoh jong ka jingïoh bhah – scheduled caste bad scheduled tribe – kiba la kiew ha ka ïoh ka kot bad imlang-sahlang (economically and socially advanced).
Haba kren shaphang ka ‘creamy layer’ hapdeng ki SC bad ST, u Justice BR Gavai u la ong ba ki don kiba hapoh ka bynta jong ka scheduled caste bad scheduled tribe kiba la shah kheiñbeiñ mynta da ki spah snem bad ki Sorkar Jylla ki dei ban ïit ïa kum kita.
“Ki Jylla ki dei ban don ka mat treikam (policy) ban ithuh ïa kita ki creamy layer napdeng ki Scheduled Caste bad Scheduled Tribe bad kyntait noh ïa ki na ka thup,” la pynpaw u Justice Gavai uba la ong ba dei tang kane ka lad ban poi sha kata ka thong ban long ïa ryngkat.
U Justice Gavai u la pynskhem ruh ba ka kyndon ban ithuh ïa kita ki ‘creamy layer’ hapdeng ki SCs/STs ka dei ban ïapher na kito ki kyndon kiba pyndonkam ïa ki Other Backward Castes (OBCs).
Haba mynjur lang bad ki jingpynpaw u Justice Gavai, na ka liang u Justice Pankaj Mithal u la ong ba ka bhah hapdeng ki SCs bad STs ka dei ban kut noh tang ha ka pateng kaba nyngkong bad ka dei ban bteng sha kawei pat ka pateng ka ba-ar lada ka pateng banyngkong ka la lah ban kynjoh kham shalor lyngba ka jingïoh bhah (reservation).
