Nongpoh, Nailar 01
Ha kawei ka jingjia ha jaka pynïeng kali jong ka kad liengsuiñ ha Umroi kaba la jia ha ka 28 tarik jong u Naitung, 2024, ka la don ka jingïashoh-jingïadat hapdeng ar kynhun jong ki samla kiba dei na ka shnong ïew Umroi bad kiba na ka shnong Umeit.
Katkum ka khubor ba la ïoh lum na u Superintendent of Police (SP) ka Ri Bhoi, u Jagpal Singh Dhanoa ha ka Sngi Palei, la ïathuh ba na ka liang ki pulit ka Khapmara PIC ha katei ka sngi ki la leit mar-mar sha katei ka jaka ba la don ka jingïashoh hapdeng jong kitei ki samla, hynrei kim shym la lap shuh.
Uwei na kitei ki samla uba don bynta ha katei ka jingïashoh-jingïadat ha katei ka jaka, ïa uba la tip kyrteng kum u Khrawboklang Sten, 28 snem ka rta na ka shnong Umroi Nongrah u la pynkut noh ïa la ka jingim da kaba sdien phasi hapoh ka kamra lajong ha ka step phyrngab jong ka 29 traik u Naitung, 2024.
La ïathuh ruh ba ïa ka met jong utei u samla la lap da ka kmie ka jong u, ka Kong Diesgracia Sten ha ka por kumba 4:30 mynstep. Hadien ka jingwan poi jong ki pulit, ïa ka met jong utei u samla la dep ban pynhiar shapoh da ki bahaïing. Ha ka jingkhmih ïa ka met jong utei u samla, ki bor pulit ki la pyntip ba lap tang ïa ka dak mong jong u tyllai phasi na ryndang.
Wat lada na ka liang ki pulit ki la ai jingmut bad pyntip halor ki jingmyntoi ban leh ïa ka post-mortem, hynrei na ka liang ki bahaïing namar kim don ka jingsuba sniew, kumta ki la kyrpad ban pyllait noh ïa kane ka bynta kaba la pdiang ruh da u majistor.
