Shillong, Nailar 01
Ki nongïalam bad ki dkhot ka Khasi Students’ Union (KSU) ha ka Sngi Palei ki la leit tur kynsan sha phyllaw jong ka Meghalaya Public Service Commission (MPSC) ha Lachumiere bad ban thang ruh ïa ka shithi jubab kaba la ai da ka MPSC halor ka jingpan jingpynshai ka seng.
Ha kane ka sngi, ki nongïalam bad dkhot ka seng ha ryngkat ki placard ki la leit tur sha phyllaw ka shlem treikam MPSC ban ïashong kyllaiñ-myngor, kum ka dak ban pyrshah ïa ka jingbym lah ban leh eiei halor ki kynrum-kynram kiba mih na ka jingthungkam ïa ki MCS, MPS bad Statistical Officer ka tnat Animal Husbandry & Veterinary.
Lah ban pynkynmaw hangne, ba ka KSU ka la dep ban ai por haduh 48 kynta ïa ka MPSC ba kan pyllait paidbah ïa ki marks ba la ïoh da ki nongïakhun ïa ka eksam jong ka Meghalaya Civil Service (Prelim), ban pynshai ïa ka jingduna jong ki kyrtong ba shah jied ha ka Meghalaya Police Service ban leh Personal Interview bad ka jingthungkam ïa arngut ki Statistical Officer ha ka jaka uwei katkum ka jingpynbna lait kam ba pynmih ha u snem 2019.
Haba la ïalum ha phyllaw ka MPSC, ki dkhot ka KSU ki la pyrta slogan “Chairman MPSC step down, step down (hiar shuki)” nalor ki placard ba don ïa ki jingthoh ba ong, “Ka hok long trai la shah knieh, ka hok ïoh kam ruh shah tuh. Wat kheiñ ba ngi dei tang ki nongpeit kai hynrei ngin long ruh ki nonghikai ïa kito kiba pyrshang ban pynkynriang da ka thok, ka jler. Ka MPSC, wat lehkai bad ka jingim u duk u suk u jynjar u shipa ba donkam shisha ban bsa: ïoh ba u paid bylleiñ un tim un tla bad phin khrew shyrta bad ka pateng ki bynta. Wat tah sia lieh ïa kaba ïong bad wat tah sia ïong ïa kaba lieh namar ba kaba lieh kan dei kaba lieh bad kaba ïong kan dei hi kaba ïong. Wat phah tohkit ïa u ‘riew thok ha u ‘riew thok namar ba ha u, kam don ka hok.”
U Chairman ka KSU Employment Monitoring Cell u samla Reuben Najiar ha kane ka sngi u la pyntip ba na ka liang jong ka seng kam hun satia ïa ka jubab pynksan jong ka MPSC, ha kaba ki la sei ïa kine ki jubab ba la ai da ka MPSC sha ka seng ban ïa tar bad thang syndon ha phyllaw MPSC.
U samla Reuben u la ong ba katkum ka jubab kaba la ai sha ka seng, la lap ba kam biang satia bad haba la pule bniah la sngewthuh ba ka don ka jingleh bym hok ha ka thung kam thung jam.
Hadien katto-katne por, na ka liang u Chairman ka MPSC u la khot ïa ki nongïalam ka KSU ban ïakren bad hadien katto-katne ba la mih na ka jingïalang, u samla Reuben u la ong, “Ha ka jingïakynduh ïa u Chairman, ngi la dawa ba ka Commission ka dei ban pyllait paidbah mardor ïa ki marks ba ïoh da baroh ki nongïakhun ïa ka eksam MCS. Halor kane, ka MPSC ka la mynjur ïa ki jingdawa jong ngi bad kular ba ïa ki marks yn sa pyllait noh”.
Lah ban kdew ba ka jingartatien ïa ka jingleh bym hok ka MPSC ka la paw pyrthei hadien ba ka la pynmih biang sa ïa ka thup jong 62 ngut ki kyrtong kiba la pynbna ba ki la pass ïa ka eksam MCS (prelim) ban ïoh ïakhun pat ïa ka eksam (main) ka ban long ha u Nailur.
Haba ïa dei bad ka eksam MPS, une u Nongïalam ka KSU u la ong ba ka seng ka la buh jingkylli halor ka rai jong ka MPSC ban ïaid lait na ka jingpynbna lait kam ha ka ban bud ïa ka ratio 1:2:5 haba khot ïa ki kyrtong sha ka personal interview.
“Ki (Commission) la khot tang khyndiat eh ki kyrtong (kumba 27 ngut) sha ka personal interview ha ka jaka ba ym duna ïa ka 42 lane 43 ngut kat kum ka ratio 1:2:5” u la ong bad bynrap “Halor kane, u Chairman ka MPSC u la pan por naba u donkam ban ïasyllok ïa kane ka kam bad ki nongïasaid aiñ ha shuwa ban ïakren biang bad ka Seng. Hynrei, ngi la ban jur ba ki dei ban bud beit ïa kaei kaba la pynbna ym ban ïaid lait na ka”.
U samla Reuben u la pyntip “Haba ïa dei bad ka kam Statistical Officer, ka Union ka buh jingkylli ïa ka rai jong ka Commission ban pynbna ïa ka result na ka bynta ar ngut ki briew haba ka jingpynbna lait kam ka long tang kawei ka post-kata ruh tang ïa ki Khasi-Jaiñtia category. Halor kane, ka MPSC ka la kam ba ka la don ka jingleh bakla ha katei ka por bad na ka Tnad ka la phah ïa ka shithi ba don ar tylli ki post. Ki la pyni ïa ngi ïa ka shithi hynrei ngi la kdew ba kum kine ki jingleh bakla kim dei shuh ban jia”.
Haba banjur ïa ka jingdonkam ban pynbeit janai ïa ka rukom treikam ka MPSC, une u Nongïalam ka KSU u la ong “Lada ka MPSC ka long kumba ka long mynta, kum kine ki jingjia kin nang ïai jia beit na ka por sha ka por.
U la pyntip ruh ba ka KSU ka la rai ba kan sa leit ïakynduh ïa ka Sorkar Jylla ha kine ki sngi ban wan ban aiti ïa ka jingtyrwa ha ka ban pynkylla ïa ka rukom treikam ka MPSC.
Haba kdew ïa ki katto-katne ki jingai jingmut, u samla Reuben u la ong, “Ngim kwah shuh ban don ka jingthung kam ïa ki ‘riew saiñpyrthei hapoh ka MPSC. Lada ka dei ban don ruh, ki briew ba shah thung ki dei ban don ha ka kyrdan kaba heh bha namar ki dei kiba khmih ïa ka Commission, kaba khmih ïa ka lawei jong ki samla pule”.
“Nalor kata, ngi kwah ruh ban ring phlim ha ka por Interview ïa ka Group-A post bad ïa ka Group B,C ba ym dei ban don shuh ka personal interview hynrei ban thung kam ïa ki kyrtong katkum ka jingwan shakhmat jong ki. Kiwei pat ki dei ka jingbuh da ka por haba thung kam kata naduh ka sngi ba pynmih ïa ka jingpynbna lait kam bad ngi dawa ba dei ban pyndep noh hapoh ka shisnem” u la ong.
