Khliehriat, Nailar:
Ka Meghalaya Star 30 Programme, kaba la sdang ha ka 15 tarik Naitung 2024 da ka State Council of Science Technology and Environment (SCSTE) halor ka thong ban ai jinghikai lane Coaching ha ki jaka sah na ka bynta 10 bnai ïa kiba ïakhun ïa ka eksamin NEET ha State Institute of Rural Development (SIRD), Nongsder.
Kumba long mynta, la don 48 ngut kiba la pynrung kyrteng hapoh ka Meghalaya Star 30 Programme ha kaba la don ruh ki nonghikai kiba la thung ban ai ki jinghikai kiba janai bad ban ïarap ïa ki samla pule ha ki jingpule jong ki bad ban pynurlong ïa ka jingangnud jong ki ban pule doktor.
Nalor ka prokram ai jinghikai ha ki jaka sah, ki samla pule ki lah ruh ban ïoh ïa ka jingpule, ki tiar bad ki jingdonkam ban kyrshan ïa ka jingpynkhreh jong ki na ka bynta NEET bad ki lah ruh ban wad ha ka Youtube da kaba thoh ‘MEGHALAYASTAR30’ bad da kaba leit ruh sha ka LMS ka SCSTE website lms.scste.org/course/view.php?id=3.
Ïa kane la pyntip da u District Planning Officer jong ka East Jaiñtia Hills District, Khliehriat.
