Shillong, Nailar 01
U President jong ka Voice of the People Party (VPP,) Bah Ardent Miller Basaïawmoit, u la ong ba ka jingjop kput ka seng ha ka ilekshon MP kam dei kaba shu jia ryngkhat hynrei ka dei namar ka jingsngewthuh u paidbah ïa kata ka lynti kaba eh bad ïa kata ka lawei kaba dum jong ki khun ki kti.
Ïa kane u Bah Ardent u la kren ha ka jingïalang ka seng ha ïew Wahïajer,West Jaiñtia Hills District na ka bynta ban ai khublei ïa ki paidbah kiba la ai ka jingkyrshan ba pura ïa ka seng ha kane ka ilekshon MP kaba la kut ha u bnai Ïaïong.
U Bah Ardent u la ai nuksa ba kane ka jingïakhun ha ka ilekshon MP ba dang shu dep bad ka jingïakhun ha ka ilekshon MLA bad MDC ka ban wan ka long kum ka jingïalehkai mareh Relay Race.
“Ngi dang dep tang kawei ka kylla ha ka ‘relay race’ bad kawei pat ka ‘relay race’ ka dei ka MDC ilekshon” u la ong
U Bah Ardent u la ong ruh ba kane ka jingjop jong ka seng ha ka ilekshon MP kam dei kaba kut hynrei ka dei tang ka jingsdang jong ka jingïaid lynti.
U la ong ba ka lah ban dei ka sien kaba nyngkong ba dei tang ka seng VPP ban leit sha ki paidbah ban ai khublei.
“Ngi don jingkyrmen ban jop bun ki MDC, namar ki paidbah ki rhem ïa ka VPP ba ki kwah ban kyrshan prah” u la ong.
Nalor kane, u Bah Ardent u la ong ba ka sorkar ka la sdang ban pynslem ïa ka ilekshon MDC da kaba ai daw ban pharia ïa ka jingdonkam ki nongthep ‘vote’ ha ki constituency hynrei don ki jaka long kumba leh pyut ki pynhap shawei ka block.
U la ong ba lada ka VPP ka ïoh ka bor ban synshar kan rat nyngkong ïa ka kam bamsap.
Kumta u la kyntu ïa ki nongtrei ka VPP ba kim dei ban sngap lada don kiba wan ban pynsngewthuh bakla namar ki kwah ban pynsngewthuh bakla hadien ba ka VPP ka la jop ïa ka MP ilekshon.
Sa shisien u la kyntu biang ïa ki paidbah lada ka sorkar ka pharia katba ki mon haba pynbeit ïa ka jingbun briew ha ki constituency ïa ka ilekshon MDC hynrei haba ka mynsiem ka la rhem ka dei ba jied ha u prah.
