Shillong, Nailar 01
Hadien ka jingpan jingbit jong ki nongpynïaid ïa ka Yatra Pilgrimage kaba dei ka kynhun ïaid kjat jong ki riewngeit niam Hindu ban pyndonkam ïa ka Krem Mawjymbuiñ kum ka jaka ban mane blei ha ka 4 tarik u Nailar 2024, na ka liang ka Dorbar Shnong Mawsynram ka la khang pyrshah bad khlem ai jingbit satia ïa katei ka kynhun hynrei katei ka kynhun ka la pynpaw ïa ka jingleh pyrshah da kaba thmu ban wan beit da ka bor ha katei ka sngi.
Katei ka kynhun ‘riewngeit Hindu kan pynlong ïa ka Yatra ne ka jingïaid kjat mynta u snem ha ka 3 bad 4 tarik u Nailar 2024 bad 2025 da kaba ïaid kjat na Shillong (Mahadev Khola) bad pynkut pat ha Mawsynram hapoh ka Krem Mawjymbuiñ da kaba lehniam-lehrukom.
Halor kane ka bynta ban pyrshah ïa kane ka jingpan jingbit jong katei ka kynhun niam, ka Dorbar Shnong Mawsynram ka la aiti ruh da ka dorkhas ha ka Deputy Commissioner (DC) ka East Khasi Hills District, ka Kong R.M Kurbah.
Haba kren sha ki lad pathai khubor, u Assistant Rangbah Shnong ka Mawsynram, Bah Hiamdor Rapsang, u la ïathuh ba ka Yatra Pilgrimage ka la pan jingbit na ka Dorbar Shnong ban pyndonkam ïa katei ka jaka mynta u snem hynrei na ka liang ka Dorbar Shnong naduh mynshem snem ka la dep ban rai ba kan nym ai jingbit shuh satia ïa ki kynhun niam ban lehniam-lehrukom ne mane blei ha katei ka krem namar ka Krem Mawjymbuiñ ka dei ka jaka jngohkai pyrthei ym ka jaka kaba yn lah ban pynlong ïa kino-kino ki lehniam-lehrukom.
U Bah Rapsang u la ïathuh ba katei ka jingrai jong ka Dorbar Shnong ban nym ailad shuh ïa kano-kano ka kynhun ban lehniam ha katei ka krem ka dei hadien ka jingïohpdiang ïa ki jingujor kiba bun na ki ‘riew paidbah kiba la buh jingkylli ïa ka Dorbar Shnong Mawsynram halor ka jingailad ban pyndonkam ïa katei ka Krem Mawjymbuiñ kum kata ka jaka mane blei.
“Ka dei ka jaka jngoh kai pyrthei kaba la ithuh da ka tnad ki kam jngoh kai pyrthei ka Sorkar Jylla bad ngi la ïoh ïa ki lad jingïarap bapher-bapher da ki phew spah snem haduh mynta, kumta halor katei ka nongrim kaba ngi kum ka Dorbar Shnong ngi la kyntait ban ai ïa ka NOC na ka bynta ka prokram jong ki”, la ong u Bah Rapsang.
U la ïathuh ba ka la don ka jingpynbor kaba khraw bha na ka liang ka Yatra Pilgrimage ïa ka Dorbar Shnong ban ai ïa katei ka Krem Mawjymbuiñ ba kin pyndonkam ban mane blei ma ki hynrei ka Dorbar Shnong da kawei ka sur ha ka jingïalang kaba ka la pynlong ha ka 27 tarik u bnai Naitung 2024 ka la shim ïa ka rai ban khang pyrshah bad ban nym ailad ïa ka Yatra ba kan lehniam hapoh katei ka krem.
“Ngi burom ïa ka sur jong u paidbah bad ngi kwah ban pynneh ïa katei ka Krem Mawjymbuiñ kumba ka long kata ka jaka jngoh kai pyrthei”, la bynrap u Bah Rapsang.
Shuh shuh u Bah Rapsang u la ong ba kum ka Dorbar Shnong ka pdiang ïa ki lada ki wan kum ki nongwan jngoh kai pyrthei hynrei ym pat ban wan lehniam-lehrukom hapoh katei ka krem da kaba pynkynmaw ruh ba ka la don ka kyndon kaba la mana tyngeh kaba buh da ka shnong ha ka Krem Mawjymbuiñ ba ki nongwan jngoh kai kim bit satia ban pyni ne lehniam hapoh katei ka krem.
U Bah Rapsang u la ong ba kaba sngewsih ka long ba ha u snem 2023, ka la don ka jingpynkheiñ ïa ki kyndon da ki katto-katne ngut kiba la wan ban lehniam-lehrukom hapoh katei ka krem.
“Mynta u snem lei-lei ngin dang skhem shuh-shuh kata ka jingmut jong ngi ba ngin kyntait ïa katei ka jingpan jingbit”, la ong u Bah Rapsang.
U la ong ba kum ka Dorbar Shnong ka burom ïa ki jait niam jong ki kynhun ngeit bapher-bapher kiba don. bad Ha ki por kiba mynshwa ruh ki la don ki nongwan lehniam-lehrukom hapoh katei ka krem hynrei ka jingbym ailad shuh jong ka shnong. Ha kane ka kynti kaba mynta ban lehniam ka dei namar ka jingpynkheiñ ïa ki kyndon kiba la buh da ka shnong bad kumba ka paw lyngba ki dak ki shin, la ïohi ba ïa ka Krem Mawjymbuiñ yn sa pynkylla kum kata ka jaka mane blei jongno-re-jongno.
“Nga shu ong mynta shi kyntien, hato ka long ban leit mane blei ne ban pynlong kata ka Puja hapoh Nan Polok? Lah ban pynlong ïa ka Puja ha madan Golflink ne ha Lady Hydari Park? Em, kin nym shah namar kiba bun ki nongwan jngoh kai pyrthei kin thut hangto”, la bynrap u Bah Rapsang.
Wat hapdeng ka jingpyrshah bad ka jingbym ai jingbit jong ka Dorbar Shnong ban lehniam-lehrukom hapoh katei ka krem da ka Yatra, la ïohi pynban ba ka la don ka jingïawer ha ka 10 bad ka 11 tarik u Nailar 2024 ban mih paidbah ban leit sha Mawsynram ban pynlong ïa ka jinglehniam hapoh katei ka Krem Mawjymbuiñ.
“Ngi khlem ai NOC ïa ki, te kumno ki nud? Ngi na ka liang ka shnong Mawsynram ngi la khreh lypa ba ha ka 10 bad 11 tarik ngin nym ailad da lei-lei ha kaba ïadei bad kata ka prokram ne ka jingthmu jong ki ba kin wan da ka bor bad kane ka long kaei-kaei kaba sngewsih ba kin wan da ka bor kumta”, la ong u Bah Rapsang.
Kaba sngewphylla ka long ba katei ka kynhun Yatra ka la leit shwa sha ka DC ban pan jingbit ha shwa ba kin pan jingbit na ka Dorbar Shnong. Na ka liang ka DC ruh ka la ai jubab ïa ka kynhun Yatra ba kan ai jingbit tad haduh ynda na ka liang ka Dorbar Shnong ka la ai jingbit shwa ma ka.
“Halor kata ngi sngewthuh kumno ki kloi ban leit shapoh DC ophis khlem pat ïoh ïa ka NOC na ngi. Lada ka DC kam buh ïa kata ka kyndon ban ong ba hap ban ïoh shwa ïa ka NOC na ka Dorbar Shnong Mawsynram ka mut kine la wan da ka bor”,
U la ong ba na ka liang ka shnong kan pyrkhing bad ïada ïa la ka jaka namar ym tip satia ïa kaei ka ban jia hadien-habud namar ka jingshida than ruh ka wanrah ka jingma ïa ka Dorbar Shnong.
