Shillong, Nailar 01
Ka India ka la khur sa kawei ka takma rnong lyngba uwei pat u nongsiat suloi u Swapnil Kusale ha ka Paris Olympics 2024 kaba la long ha Chateauroux ha ka sngi Palei.
Une u nonglum tiket rel u la khur ïa ka khusnam rnong ha ka jingïakop siat kaba 50m 50m Rifle 3 Positions jong ki shynrang ha kaba u la lah ban kamai 451.4.
U Kusale, uba u kpa lem bad u hynmen jong u, ki dei ki nonghikai ha kawei ka skul bad ka kmie jong u, ka dei ka ‘sarpanch’, u la lah ban kynjoh ha ka jingkheiñ kyllum da 451.4 ha ka jingïakop siat phainal kaba don haduh 8 ngut na ka bynta ban wan ha ka kyrdan kaba lai hadien ba u la ïoh ïa ka kyrdan kaba hynriew ha kawei ka jingïakhun.
Hadien ba la kut ka kneeling bad ka prone round, u Kusale ka la wan ha ka kyrdan kaba san da kaba kamai 310.1. Ha ka jingïakop siat da kaba shu ïeng jong ka ‘elimination round’, utei u nongïalehkai ka ri u la don ha ka thup kaba saw bad ha kaba kut u la lah ban khur ïa ka takma rnong.
“Ngam shym la bam ei ei, nga sngew ïa ka jingkynruh hapoh ka kpoh jong nga. Tang shu dih ïa ka sha saw bad nga la wan shane. Man ka miet shwa ka jingïalehkai, nga shu duwai ha U Blei,” la ong u Kusale hadien ka jingjop kaba khlem pat ju ïoh mynno mynno ruh.
“Mynta ka sngi ka jingkhih jong ka dohnud ka la long ha ka liang kaba kham shalor. Nga shu pyrshang ban teh lakam ïa ka jingring mynsiem jong nga bad ngam shym la pyrshang da kumwei pat. Baroh ki long kham bun ne kham duna kumjuh ha kane ka kyrdan,” u la bynrap.
Kumba ka long mynta kane ka dei ka takma kaba lai ïa ka India kata hadien ba ka Manu Bhaker ka la khur ïa ka takma rnong ha baroh ki jingïakop jong ka 10m air pistol na ka bynta ki kynthei bad ka mixed team lem bad u Sarabjot Singh.
