Shillong, Nailar 01
Ha ka khubor ba la ïohlum lyngba ka ‘website’ jong ki pulit ka jylla ha ka Sngi Palei la ong ba u Assistant Engineer, MePDCL, Tura West Distribution Sub-Division, Tura, u la ujor ba ha ka 25 tarik Naitung, uwei u nongshong shnong na Ballonggre u la wan sha ka shlem treikam jong ka MePDCL, Tura, ha kaba u la ai jingtip ba ha ka 10 tarik Naitung, uwei u briew u bym lah ban ithuh, hynrei uba la kam ïalade bad u dei u nongpeit ïa u ‘Meter’ (Meter Reader) na ka MePDCL, u la ong ba utei u nongshong shnong u dei ban siew T. 5,750 kaba dei ka bai thang bording ilektrik.
Hynrei, la ong pat ba utei u nongshong shnong u la dep ban siew ïa ka bai thang bording ilektrik lyngba ka ‘GPay’. Nalorkata, utei u nongshong shnong u la ong ba utei uba la kam ïalade ba u dei u ‘Meter Reader’ u dei uba la paw ha ki dur-khih ba la mih ha ‘Social Media’. Ha kita ki dur-khih la kynnoh ba utei uba kam ba u dei u ‘Meter Reader’ u la pan pisa na ki paidbah kiba dei ruh ki nongpyndonkam bording ilektrik ha ka thaiñ Tura.
Ha kawei pat ka jingjia, ki pulit ki la ong ba ka Kong Priska Ryntathiang ka la ujor ba ha ka 29 tarik Naitung ha ka por kumba 2 baje mynstep, ki runar ki la tuh ïa ka pisa T. 7,000, hynñiew tula ka ksiar bad kawei ka Mobile Phone na ka ïing sah jong ka kaba don ha Pyndengnongbri, Eastern West Khasi Hills. La ong ba kane ka jingshah tuh baroh ka la kot sha kumba T. 5.64 lak.
Shuh shuh ki pulit ki la ong ba ka Jarosh Marak ka la ujor ba ha ka miet jong ka 29 tarik Naitung, ki runar ki la tuh ïa ka ar shaka jong ka (ML-07B-8608) na ka ïing sah jong ka kaba don ha New Sarangma, North Garo Hills.
